UJobe 7

₁“Umshikashika

akusiwo yini owabantu emhlabeni,

nemihla yabo ayinjengayo yini

eyomqashwa na?

₂Njengesigqila silangazelela ithunzi,

nosebenzayo elindele umholo wakhe,

₃kanjalo ngabelwe izinyanga zokungenanzuzo,

ngamiselwa ubusuku benhlupheko.

₄Nxa ngilala ngithi:

‘Ngiyovuka nini na?’

Ubusuku bude,

kuze kuse ngibinyabinyeka.

₅Umzimba wami wembozwe yizimpethu nothuli.

Isikhumba sami siyaphola,

sibuye sibhicike.

₆“Imihla yami iyashesha kunesaluko,

iphela ingenathemba.

₇Khumbula ukuthi

ukuphila kwami kungumoya,

iso lami aliyukubuye likubone okuhle.

₈Iso elingibonayo alisayukungibona,

amehlo akho esangibhekile,

ngiyobe ngingasekho.

₉Njengokuba ifu linyamalala

lingabe lisaba bikho,

unjalo-ke owehlele endaweni yabafileyo, akasayukukhuphuka.

₁₀Akasayukubuyela endlini yakhe,

indawo yakhe ayisayukumazi.

₁₁“Ngakho-ke nami angizukuwunqanda

umlomo wami,

ngizokhuluma nginobuhlungu emoyeni wami,

ngikhononde ngomunyu

emphefumulweni wami.

₁₂Ngilulwandle yini,

noma inkanyamba yolwandle,

uze ungibekele abalindi na?

₁₃Lapho ngithi:

“Umbhede wami uzongiduduza,

icansi lami lingithwalise

ukukhononda kwami,

₁₄uyangesabisa ngamaphupho,

ungethuse ngemibono,

₁₅ukuze umphefumulo wami

uqoke ukuklinywa nokufa

kunokuba ngibe kulo mzimba.

₁₆Ngiyakuzonda ukuphila kwami,

angiyukuhlala njalo, ngiyeke,

ngokuba imihla yami iyize.

₁₇Uyini umuntu ukuba umenze abe mkhulu,

nokuba ubeke inhliziyo yakho kuye,

₁₈nokuba umhambele njalo ekuseni,

umhlole imizuzu ngemizuzu na?

₁₉Kuyoze kube nini

ungawasusi amehlo akho kimi na?

Ngiyeke ngize ngigwinye

isikhwehlela sami.

₂₀Uma ngona,

ngenzani kuwe mlindi wabantu na?

Ungimiseleni ngibe yinkololo yakho,

ngize ngibe ngumthwalo nakimi na?

₂₁Awusithetheleli ngani isiphambeko sami,

ususe isono sami na?

Ngokuba manje ngiyakulala phansi othulini,

uyakungifuna, kepha angiyukuba bikho.”