UJobe 38

₂“Ngubani lo ofiphaza iseluleko ngamazwi

angenalwazi na?

₃Bopha ukhalo lwakho njengendoda,

ngizokubuza, wena ungazise.

₄Wawukuphi lapho ngibeka

izisekelo zomhlaba na?

Ngitshele uma ukwazi ukuqonda.

₅Ngubani owamisa izilinganiso zawo,

ngabe uyazi na?

Ngubani owelula umucu wokulinganisa

phezu kwawo na?

₆Zabekwa phezu kwani izisekelo zawo na?

Labekwa ngubani itshe lawo legumbi,

₇lapho izinkanyezi zokusa

zihlabelela kanyekanye,

nawo wonke amadodana

kaNkulunkulu ejabula na?

₈“Ngubani owavalela ulwandle ngezivalo,

lapho luqhibuka, luphuma esiswini,

₉ngesikhathi ngibeka amafu

eba yisembatho salo,

nesigayegaye siba yimbeleko yalo,

₁₀nalapho ngilumisela umngcele walo,

ngimisa imigoqo nezicabha,

₁₁ngathi:

‘Uyokhuphuka ugcine lapha,

kepha awuyukudlula,

kulapho amaza akho

aziqhenyayo azokuma khona’?

₁₂“Selokhu waba khona,

sewake wakuyala yini ukusa,

wenza intathakusa iyazi indawo yayo,

₁₃ukuze ibambe amagumbi omhlaba,

izikhohlakali zivuthululwe kuwo na?

₁₄Uguquka njengobumba lophawu lokusicilela,

ludayiwe njengesembatho.

₁₅Ukukhanya kugodliwe ezikhohlakalini,

kwaqedwa nobudlova bazo.

₁₆“Wake wangena emithonjeni yolwandle,

wahamba phansi ezinzulwini zalo na?

₁₇Sewake wawakhonjiswa yini

amasango okufa,

wabona amasango ethunzi lokufa na?

₁₈Uyabuqonda yini ububanzi bomhlaba na?

Yisho uma ukwazi konke lokho.

₁₉“Iphi indlela eya lapho

kuhlala khona ukukhanya,

nobumnyama na?

iphi indawo yabo,

₂₀ukuze ukuyise endaweni yakho,

uqonde imikhondo yendlu yakho na?

₂₁Angithi uyakwazi,

ngokuba wawusuzelwe,

nomumo wemihla yakho mkhulu na?

₂₂“Wake wangena yini ezinqolobaneni zeqhwa,

wabona izinqwaba zesichotho

₂₃engiziqongelele isikhathi sokuhlupheka

nosuku lokulwa nolwempi na?

₂₄Iphi indlela eya lapho

ukukhanya kuhlakazwa khona,

nalapho umoya wasempumalanga

uhlakazekela khona emhlabeni na?

₂₅Ngubani ovulele ukuchichima kwamanzi,

umsele nonyazi lokuduma, indlela,

₂₆ukunisa imvula ezweni

elingahlalwa muntu,

nasehlane elingenamuntu,

₂₇ukusuthisa ihlane kwahlongasibi

nokuhlumisa uhlaza na?

₂₈Ukhona yini uyise wemvula na?

Ngubani owazala amathonsi amazolo na?

₂₉Iqhwa liphuma esiswini sikabani,

nesithwathwa sizalwa ngubani na?

₃₀Amanzi ayaqina abe njengetshe,

ubuso botwa bube yiqhwa.

₃₁“Ungawabopha yini amaketanga eSilimela,

uthukulule izintambo zeMpambano na?

₃₂Ungazikhipha yini izinkanyezi ngesikhathi sazo,

uhole uMthala nohoye lwezinkanyezi zawo na?

₃₃Uyazazi yini izimiso zasezulwini?

Ungazibekela yini

umthetho wokubusa kwazo emhlabeni na?

₃₄“Ungamemeza yini kuze kuzwakale emafini,

ukuze izikhukhula zikusibekele na?

₃₅Ungayithuma yini imibani ukuba ihambe,

bese ithi kuwe:

‘Bheka, silapha’ na?

₃₆Ngubani obeke ukuhlakanipha phakathi komuntu,

onika ukuqonda enhliziyweni na?

₃₇Ngubani ongabala amafu ngokuhlakanipha,

athulule izimvaba zamanzi zasezulwini,

₃₈lapho uthuli luphenduka isigaxa,

namagabade anamathelane na?

₃₉“Ungalizingelela yini ibhubesi, impango,

usuthise iphango lamabhongo amabhubesi,

₄₀lapho elala emiphandwini yawo,

noma ecuthe ehlozini na?

₄₁Ngubani olungisela igwababa ukudla kwalo,

lapho amaphuphu alo ekhala kuNkulunkulu,

ezulazula, ngenxa yokweswela ukudla na?”