UJobe 22

₂“Umuntu angaba yini

wusizo kuNkulunkulu na?

Ohlakaniphe kakhulu

angaba wusizo yini kuye na?

₃Kuyintokozo yini kuSomandla uma ulungile?

Kunomvuzo yini kuye

uma wenza izindlela zakho

zibe msulwa na?

₄“Ngabe ukusola ngenxa yokumesaba

kwakho yini,

aze angene nawe ekwehlulelweni na?

₅Ububi bakho abubukhulu yini na?

Izono zakho azinakuphela.

₆Ngokuba uthathe ngeze izibambiso kubafowenu,

wahlubula abampofu izingubo zabo.

₇Awumphuzisanga amanzi okhatheleyo,

awumnikanga ukudla olambileyo.

₈Umuntu onamandla, izwe lingelakhe;

ohlonishwayo uhlala kulo.

₉Uxoshe abafelokazi bengenalutho,

wafihliza izingalo zezintandane.

₁₀Ngakho-ke uzohaqwa yizingibe;

wethuswe wuvalo oluzumayo.

₁₁Uyokwembozwa ngubumnyama,

ukuze ungaboni,

nesikhukhula samanzi siyakukusibekela.

₁₂“UNkulunkulu akekho yini

phezulu ezulwini na?

Bheka, izinkanyezi eziphakemeyo

ukuthi ziphakeme kangakanani.

₁₃Uthi wena:

‘UNkulunkulu wazini na?

Angehlulela yini engale

kwesigayegaye na?

₁₄Amafu ayamsibekela

ukuze angaboni;

uhamba esiyingelezini sezulu.’

₁₅Uyakuyigcina yini indlela yasemandulo

eyahanjwa yizikhohlakali na?

₁₆Yizo ezahlwithwa kungakabi yisikhathi,

ezisisekelo sazo sathululwa njengomfula,

₁₇ezazithi kuNkulunkulu:

‘Suka kithi;

uSomandla angenzani na?’

₁₈Kepha nguye owagcwalisa izindlu zazo ngokuhle.

Amasu ezikhohlakali akude nami.

₁₉“Abalungileyo bayakukubona, bathokoze;

abangenasici bayabaklolodela, bathi:

₂₀‘Impela ababemelene nathi sebebhujisiwe,

nabakushiyileyo kuqothulwe ngumlilo.’

₂₁“Mawubuyisane noNkulunkulu,

ukuze ube nokuthula;

ngaleyo ndlela, okuhle kuyakufika kuwe.

₂₂Ake wemukele imfundiso

ephuma emlonyeni wakhe,

ubeke amazwi akhe

enhliziyweni yakho.

₂₃Uma ubuyela kuSomandla, uyakusimamiswa,

uma ususa ukungalungi ethendeni lakho,

₂₄ulahle igolide lakho othulini,

nelase-Ofiri ulitshinge phakathi

kwamatshe esigodini,

₂₅uSomandla uyakuba yigolide lakho

nesiliva elikhazimulayo kuwe.

₂₆Ngalokho uyothokoza ngoSomandla,

ubuso bakho ubuphakamisele kuNkulunkulu.

₂₇Uyakukhuleka kuye, akuzwe,

wena ufeze izithembiso zakho.

₂₈Uyakunquma ukwenza okuthile,

kwenzeke,

ukukhanya kuyokhanya ezindleleni zakho.

₂₉Uma bekwehlisa isithunzi,

uyakuthi: ‘Kungukuphakanyiswa!’

ngokuba uyamsindisa ozithobayo.

₃₀Umuntu ongemsulwa uyakumhlenga naye,

uyakumhlenga ngobumsulwa bezandla zakho.”