UJobe 18

₂“Uyokuyeka nini lokhu kukhuluma na?

Ake ucabangisise, bese siyakhuluma.

₃Kungani sithathwa njengezilwane,

siyizithutha yini emehlweni akho na?

₄Wena ozidwengulayo ngenxa yolaka lwakho,

umhlaba uyoshiywa yini ngenxa yakho,

nedwala lisuswe endaweni yalo emhlabeni na?

₅Yebo, ukukhanya kwesikhohlakali kuyacishwa,

nelangabi lomlilo waso aliyukukhanya.

₆Ukukhanya kuyafiphala ethendeni laso,

nesibani saso siyacima phezu kwaso.

₇Izinyathelo zaso ezinamandla ziyafinyezwa,

namasu aso asiqumbe phansi.

₈Ngokuba izinyawo zaso zibanjwe enethini,

sihamba phezu komwowane.

₉Unoxhaka usibambe esithendeni,

nogibe lwasibamba.

₁₀Sithukuselwe isihibe emhlabathini,

nonoxhaka endleleni.

₁₁Ingebhe iyasethusa nxazonke,

isezithendeni zaso.

₁₂Inhlupheko isilambele,

nenhlekelele isilindele lapho sikhubeka.

₁₃Izingxenye zesikhumba saso ziyakudliwa,

yebo, izibulo lokufa

kuyawadla amalungu aso.

₁₄Siyakususwa ethendeni laso esilethembayo,

siyiswe enkosini yengebhe.

₁₅Ethendeni laso kuyohlala okungesibo abaso,

indawo yaso ichelwe ngesibabuli.

₁₆Kuyokoma izimpande zaso phansi,

phezulu kubune amagatsha aso.

₁₇Kuyakuphela ukukhunjulwa kwaso emhlabeni,

kungabi bikho okhumbula

igama laso emigwaqweni.

₁₈Siyakuxoshwa ekukhanyeni,

siyiswe ebumnyameni,

sixoshwe emhlabeni.

₁₉Asiyukuba nabantwana

noma abazukulu phakathi kwabakubo,

noyosinda lapho sasihlala khona.

₂₀Abasentshonalanga bethuswa lusuku lwaso,

nabasempumalanga bakhungathwa ngukwesaba.

₂₁Impela lezi yizindlu zowenza okubi,

impela lena yindawo yongamazi uNkulunkulu.”