UJobe 11

₂“Ngabe awayukuphendulwa yini

amazwi amaningi kangaka na?

Iphoshophosho lingaxolelwa yini na?

₃Ukuqavitha kwakho

kufanele kubathulise

yini abantu na?

Nalapho ukloloda,

akekho yini ongakuthela ngehlazo na?

₄Ngokuba uthe:

‘Ukufundisa kwami kulungile;

ngimsulwa emehlweni akho Nkulunkulu.’

₅Sengathi uNkulunkulu angakhuluma,

akuvulele izindebe zakhe,

₆akwazise izimfihlakalo zokuhlakanipha kwakhe,

ngokuba ukuhlakanipha kwakhe kubanzi,

ukuze wazi ukuthi uNkulunkulu uzokwenza

ukhohlwe yingxenye yecala lakho,

ukuze kube kuhle kuwe.

₇“Ungayithola yini imfihlakalo kaNkulunkulu na?

Ungawuthola yini umkhawulo kaSomandla na?

₈Kuphakeme kunezulu, ungenzani na?

Kujulile kunendawo yabafileyo,

ungazini ngakho na?

₉Isilinganiso sakho side kunomhlaba,

sibanzi kunolwandle.

₁₀Uma edlula, avalele,

abizele ekwehluleleni,

ngubani ongamvimba na?

₁₁Ngokuba uyabazi abantu bamanga,

lapho ebona inkohlakalo, akayukuyinaka yini na?

₁₂Uma umuntu ongahlakaniphile

engaba ngohlakaniphileyo,

nethole lembongolo yasendle lingazalwa lingumuntu.

₁₃“Uma uqondisa kahle inhliziyo yakho,

welulela izandla zakho kuye,

₁₄uma udedisele kude inkohlakalo esesandleni sakho,

ungakuhlalisi ukungalungi emathendeni akho,

₁₅impela uyakubuphakamisa ubuso bakho ungenamahloni,

uyokuma uqine, ungenakwesaba.

₁₆Uyakukhohlwa ukuhlupheka kwakho,

uyakukukhumbula njengamanzi adlulileyo.

₁₇Ukuphila kwakho kuyokhanya kunemini;

nobumnyama buyofana nokusa nje.

₁₈Uyoba ngophephile,

ngokuba likhona ithemba,

uyovikeleka kahle,

ulale phansi uphephile.

₁₉Uyakulala, kungabi bikho okuphazamisayo;

abaningi bayakuzincengela kuwe.

₂₀Kepha amehlo ezikhohlakali ayakufiphala;

ayiyukuba bikho nendawo yokuphephela;

ithemba lazo liyakuba ngukuphuma komphefumulo.”