U-Izaya 52

₁Vuka, vuka,

wembathe amandla akho, Ziyoni,

ugqoke izingubo zakho zakwanokusho,

wena Jerusalema, muzi ongcwele,

ngokuba akusayukungena kuwe

ongasokile nongcolileyo.

₂Zithintithe uthuli,

usukume, uhlale, Jerusalema elithunjiweyo;

zikhulule eziboshweni ezisentanyeni yakho,

wena ndodakazi yaseZiyoni ethunjiweyo.

“Nathengiswa ngento engelutho;

niyakuhlengwa ngaphandle kwemali.”

“Ekuqaleni abantu bami behlela eGibhithe,

bagogobala khona.

I-Asiriya labacindezela ngaphandle kwesizathu.

₅“Manje ngisasalelwe yini lapha,” kusho uSimakade,

“njengoba abantu bami bethunjiwe

ngaphandle kwesizathu na?

Ababusi babo babanga umsindo,” kusho uSimakade,

“negama lami lihlanjalazwa usuku lonke.

₆Ngakho-ke, abantu bami bayolazi igama lami;

ngalolo lusuku bayoqonda

ukuthi yimi othi: bhekani, ngilapha.”

₇Zinhle kangakanani ezintabeni,

izinyawo zomemezela ukuthula,

noletha izindaba ezinhle;

ezwakalise ukusindiswa,

oshoyo kulo iZiyoni, ukuthi:

“UNkulunkulu wakho uyabusa.”

₈Abalindi benu baliphakamisile izwi labo,

bayakhamuluka bethokoza kanyekanye,

ngokuba bayozibonela ngawabo amehlo,

lapho uSimakade ebuyela eZiyoni.

₉Qhumukani, nikhamuluke kanyekanye ngokuthokoza,

nina zindawo ezichithekileyo eJerusalema,

ngokuba uSimakade ubaduduzile abantu bakhe,

ulihlengile iJerusalema.

₁₀USimakade uyembulile ingalo yakhe engcwele

emehlweni ezizwe zonke,

yonke imikhawulo yomhlaba

iyoyibona insindiso kaNkulunkulu wethu.

₁₁Hambani, hambani, phumani lapho!

Ningathinti lutho olungcolileyo,

phumani phakathi kwalo,

zihlambululeni, nina eniphatha izitsha zikaSimakade.

₁₂Ngokuba aniyukuphuma nixhamazela.

Aniyukuhamba nibaleka,

ngokuba uSimakade uyohamba phambi kwenu;

uNkulunkulu ka-Israyeli uyoba nasemuva kwenu.

₁₃Bheka, inceku yami iyoba nempumelelo;

iyakukhuliswa, iphakanyiswe,

iphakame kakhulu.

₁₄Njengalokhu babebaningi abamangala ngayo,

ubuso bayo babonakele kunobabantu,

nesimo sayo, kunesamadodana abantu;

₁₅kanjalo iyokwethusa izizwe eziningi;

amakhosi ayovala imilomo ngenxa yayo,

ngokuba ayobona lokho angazange akutshelwe,

nalokho angakaze akuzwe, ayokuqonda.