U-Izaya 49

₁Ngilaleleni nina ziqhingi,

niqaphele nina bantu abakude;

uSimakade ungibizile kwasesibelethweni,

wangiqamba igama kwasesiswini sikamame.

₂Wawenza umlomo wami

wanjengenkemba ebukhali,

wangithukusa ethunzini lesandla sakhe,

wangenza umcibisholo omenyezelayo,

wangithukusa emgodleni wakhe.

₃Wathi kimi:

“Wena uyinceku yami,

Israyeli, engizoluveza ngayo udumo lwami.”

“Ngikhandlekele ize,

amandla ami ngiwachithele okuyize nokungelutho;

nokho ubulungiswa obungifanele bukuSimakade,

nomvuzo wami ukuNkulunkulu wami.”

₅Manje uthi uSimakade

owangibumba kwasesibelethweni,

ukuba ngibe yinceku yakhe

yokubuyisela kuye uJakobe,

nokuba kuqoqelwe kuye u-Israyeli,

ngokuba ngihloniphekile emehlweni kaSimakade.

UNkulunkulu wami waba ngamandla ami.

₆Yebo, uthi:

“Kuyinto elula ukuba ube yinceku yami,

ukuvusa izizwe zakwaJakobe,

nokubuyisa abaseleyo bakwa-Israyeli;

ngalokho ngiyakukwenza

ube ngukukhanya kwabezizwe,

ube yinsindiso yami

kuze kube semkhawulweni womhlaba.”

₇Usho kanje uSimakade,

uMhlengi ka-Israyeli noNgcwele wakhe,

kodelelekile oyisinengiso esizweni,

noyinceku yababusi, uthi:

“Amakhosi ayakubona qede asukume;

izikhulu zikubone, bese zikhothama

ngenxa kaSimakade othembekileyo,

oNgcwele ka-Israyeli; okukhethileyo.”

“Ngiyakukuphendula ngesikhathi somusa,

ngikusize ngosuku lokusindiswa;

ngiyakukulondoloza,

ngikubeke ube yisivumelwano sabantu

sokubuyisa izwe,

nokubenza badle amafa achithekileyo.

₉Eziboshweni, uthi:

‘Phumani,’

kulabo abasebumnyameni,

uthi: ‘Zibonakaliseni.’

“Bayoklaba ngasendleleni,

amadlelo abo abe semagqumeni wonke.

₁₀Abayukulamba, abayukoma,

abayukushaywa yisifudumezi selanga,

ngokuba Yena onozwelo kubo

uyakubahola abayise emithonjeni yamanzi.

₁₁Ngiyokwenza zonke izintaba zami

zibe yimigwaqo,

imendo yami iyakuphakanyiswa.

₁₂Bheka, laba bayakuvela kude;

bheka, laba bayakuvela enyakatho nasentshonalanga;

nalaba eSinimi.”

₁₃Jabulani mazulu,

uthokoze nawe mhlaba,

qhumukani zintaba, nihube,

ngokuba uSimakade ubaduduzile abantu bakhe,

unozwelo kwabahluphekileyo bakhe.

“USimakade ungishiyile,

iNkosi ingikhohliwe.”

₁₅“Owesifazane angakhohlwa yini

ngumntwana wakhe oncelayo,

angabi naluzwelo endodaneni ayizalayo na?

Yebo, bona bangakhohlwa,

kodwa Mina angiyukukukhohlwa wena.

₁₆Bheka, ngikulobe entendeni yezandla zami,

izingange zakho ziphambi kwami njalo.

₁₇Abantwana bakho bayashesha;

abakuchithayo nabakwenza ize bayophuma kuwe.

₁₈Phakamisa amehlo akho ubuke nxazonke,

bonke bayaqoqana, beza kuwe;

ngifunga ngiyagomela,” kusho uSimakade,

“impela uyakubagqoka bonke njengemvunulo,

ubabhince njengomakoti.

₁₉“Izindawo zakho ezichithekileyo neziyize,

nezwe lakho eliqothuliweyo kuyakuminyana

ngabakhileyo kukho,

nabakugwinyileyo bayakuba kude.

₂₀Abantwana obazale ngesikhathi sakho sokuhlupheka

bayothi ezindlebeni zakho:

‘Indawo engikuyo iminyene;

sukani ukuze ngihlale.’

₂₁Uyothi enhliziyweni yakho:

‘Ngubani ongizalele laba bantwana,

lokhu ngiphuciwe abantwana bami, angisenalutho,

ngingumthunjwa nozulane na?

Ngubani obakhulisile laba na?

Bheka, ngasala ngedwa,

babekuphi laba na?’ ”

“Ngizakuphakamisela izizwe isandla sami,

ngiphakamisele abantu ibhanela lami;

bayakuletha amadodana akho bewagone esifubeni,

namadodakazi akho bewathwele ehlombe.

₂₃Amakhosi ayakuba ngabazanyana bakho,

nezindlovukazi zawo zibe ngabancelisi bakho;

bayokukhothamela, ubuso bubheke phansi,

bakhothe uthuli lwezinyawo zakho;

uyokwazi ukuthi nginguSimakade,

abethembela kimi abayukujabha.”

₂₄Amaqhawe angayephucwa yini impango,

nolungileyo angaphunyuka ekuthunjweni na?

“Yebo, abathunjwa abangamaqhawe bayakuthathwa,

nempango yabacindezeli yophulwe,

kodwa Mina ngiyakulwa naye olwa nawe,

ngibasindise abantwana bakho.

₂₆Ngiyakubadlisa abakucindezelayo, inyama yabo,

badakwe yigazi labo

kube ngathi bekuyiwayini elimnandi;

abantu bonke bayokwazi

ukuthi Mina Simakade nginguMsindisi wakho,

uMhlengi wakho,

uMninimandla kaJakobe.”