U-Izaya 44

₁“Manje yizwa Jakobe, nceku yami,

Israyeli engimkhethileyo.

₂Usho kanje uSimakade owakudalayo,

wakubumba kwasesibelethweni,

oyakukusiza, uthi:

Ungesabi, Jakobe, nceku yami,

wena Jeshuruni engikukhethileyo.

₃Ngokuba ngiyakuthela amanzi

phezu kokomileyo,

nezikhukhula phezu kokomileyo,

ngiyakuthulula uMoya wami

phezu kwabantwana bakho,

nesibusiso sami

phezu kwezizukulwane zakho;

₄bayakuhluma phakathi kotshani,

njengeminyezane ngasemifudlaneni yamanzi.

₅Omunye uyakuthi:

‘NgingokaSimakade;’

omunye uyakuzibiza

ngegama likaJakobe,

omunye alobe esandleni sakhe,

ngingokaSimakade,

azibize ngegama lika-Israyeli.”

₆“Usho kanje uSimakade,

iNkosi ka-Israyeli,

noMhlengi wakhe,

uSimakade Wamabandla, uthi:

ngingowokuqala, futhi ngingowokugcina,

ngaphandle kwami akekho uNkulunkulu.

₇Ngubani onjengami na?

Makakumemezele, makakumemezele,

akubeke phambi kwami.

Ngubani owabikezela emandulo

ngezinto ezisazokwenzeka na?

Mabasitshele okusazokwenzeka.

₈Ningabi naluvalo, ningesabi;

angimemezelanga yini

kusukela emandulo, nganazisa na?

Nina ningofakazi bami.

Ukhona yini uNkulunkulu

ngaphandle kwami na?

Qha, alikho iDwala; angilazi.”

₉Bonke abenza izithombe ezibunjiweyo bayize,

nezinto abazithokozelayo azinanzuzo kubo,

ofakazi babo ababoni, futhi kabazi,

bayothelwa ngehlazo.

₁₀Ngubani owenza unkulunkulu,

abumbe umfanekiso ongenakukwenza okuhle na?

₁₁Bonke abasikhonzayo bayothelwa ngehlazo,

nabakhandi bangabantu nje,

mabahlangane bonke,

mabasukume bonke,

bangenwe yingebhe;

bonke bayakuthelwa ngehlazo kanyekanye.

₁₂Umkhandinsimbi wenza ithuluzi,

uyalisebenza emalahleni,

alicangcathe ngezando,

alisebenze ngamandla ezingalo zakhe.

Uyalamba, angabi namandla,

uma engawaphuzi amanzi, uyakhathala.

₁₃Umbazi welula intambo yokukala,

adwebe umuthi ngokubomvu,

awugwede ngezingwedo,

awuklame ngensimbi yokudweba isiyingi,

awenze ngomfanekiso womuntu,

ube nobuhle bomuntu;

ukuba uhlale endlini.

₁₄Uyazigawulela imisedari,

athathe imikhoba nemi-okhi,

akuvikele phakathi kwemithi yehlathi;

utshala umsedari,

imvula iwenze ukhule.

₁₅Bese kuba ngokomuntu

ukuba abase ngakho;

uthatha okunye kukho, othe;

abase umlilo, abhake isinkwa;

wenza futhi unkulunkulu, amkhothamele;

wenza isithombe esibaziweyo, asikhulekele.

₁₆Ushisa ingxenye yawo emlilweni;

phezu kwenye ingxenye, ose izoso,

adle inyama, asuthe;

yebo, uyotha athi:

“Halala! Sengifudumele, ngothe umlilo.”

₁₇Ngokuseleyo wenza ngakho unkulunkulu

nesithombe sakhe;

akukhothamele, akhuleke kukho,

athandaze kukho, athi:

“Ngisindise; ungunkulunkulu wami.”

₁₈Kabazi, kabaqondi,

ngokuba amehlo abo uwasilekile ukuze bangaboni,

nezinhliziyo zabo ukuze bangaqondi.

₁₉Akekho okhumbulayo,

nokwazi ukuqonda bese, ethi:

“Ingani ingxenye yawo ngiyishise ngomlilo,

ngapheka isinkwa phezu kwamalahle awo,

ngosa inyama, ngayidla;

ngokuseleyo kuwo, ngenza okuyisinengiso;

ngakhothama phambi kwesiqu somuthi.”

₂₀Udla umlotha,

inhliziyo ekhohlisiweyo imdukisile;

akanakuwusindisa umphefumulo wakhe,

nokuba athi:

“Akukho yini amanga kwesokunene sami na?”

₂₁“Khumbula lezi zinto, Jakobe,

wena Israyeli,

ngokuba uyinceku yami; ngikudalile,

uyinceku yami;

Israyeli, angiyukukukhohlwa.

₂₂Iziphambeko zakho ngizesule njengefu,

nezono zakho njengomlaza;

buyela kimi, ngokuba ngikuhlengile.”

₂₃Thokozani, mazulu,

ngokuba uSimakade usukumile,

nijabule nina zindawo eziphansi zomhlaba,

nihlabelele kakhulu nina zintaba,

nawe hlathi nayo yonke imithi ekuwe,

ngokuba uSimakade umhlengile uJakobe,

ngokuhlabelela, wazidumisa ngo-Israyeli.

₂₄Usho kanje uSimakade uMhlengi wakho,

nowakubumba kwasesiswini, uthi:

“NginguSimakade owenza konke,

oweneka izulu yedwa,

wendlala umhlaba ngokwakhe,

₂₅oshafisa izibonakaliso zabaphrofethi bamanga,

enze ababhuli ukuba bahlanye;

obuyisela emuva abahlakaniphileyo,

enze ukwazi kwabo kube ngubuwula;

₂₆yiMina ofeza izwi lezinceku zakhe,

enze konke okubikezelwa yizithunywa zakhe,

akhulume ngeJerusalema, athi:

‘Liyohlalwa,’

nangemizi yakwaJuda, athi ngayo:

‘Izokwakhiwa,’

nencithakalo, athi ngayo:

‘Ngiyoyivusa.’

₂₇Oshoyo kuwo umsinga, athi:

‘Yisha, ngiyayomisa imifula yakho;’

₂₈othi ngoKhoresi:

‘Ungumelusi wami,

uyakufeza konke okwentando yami,

athi ngeJerusalema: liyakwakhiwa,

nakulo ithempeli:

Isisekelo sakho siyakubekwa.’ ”