U-Izaya 43

₁Manje usho kanje uSimakade

owakudala wena Jakobe,

nowakubumba wena Israyeli, uthi:

“Ungesabi ngokuba ngikuhlengile,

ngikubize ngegama lakho;

ungowami.

₂Uma udabula emanzini,

Mina ngiyokuba nawe,

nemifula ayiyukukukhukhula;

nalapho udabula emlilweni,

awuyukusha;

ilangabi aliyukukushisa.

₃Ngokuba Mina nginguSimakade

uNkulunkulu wakho,

oNgcwele ka-Israyeli

uMsindisi wakho.

IGibhithe ngilinikele laba yinhlawulo yakho;

iKhushe neShebha esikhundleni sakho.

₄Ngokuba uyigugu emehlweni ami,

uhloniphekile, futhi ngiyakuthanda;

ngiyonikela abantu esikhundleni sakho,

nezizwe esikhundleni sokuphila kwakho.

₅Ungesabi, ngokuba nginawe,

ngiyakuletha abozalo lwakho

bevela empumalanga,

ngikuqoqe nasentshonalanga.

₆Ngiyothi kuyo inyakatho:

‘Bakhulule,’

nakuyo iningizimu, ngithi:

‘Ungabagodli.’

Lethani amadodana ami

asuka ezweni elikude,

namadodakazi ami

avela emikhawulweni yomhlaba,

₇yilowo nalowo obizwa ngeGama lami,

engimdalele udumo lwami,

ngambumba, futhi ngamenza.”

₈Lethani abantu abayizimpumputhe

bebe benamehlo,

nabayizithulu

bebe benezindlebe.

₉Izizwe zonke mazihlangane ndawonye;

abantu bonke babuthane.

Ngubani phakathi kwabo ongasho lokhu,

asitshele izinto zakuqala na?

Mabalethe ofakazi babo

ukuze bazobafakazela,

mabezwe bese bethi:

“Kuliqiniso.”

₁₀“Ningofakazi bami,” kusho uSimakade,

“nenceku yami engiyikhethileyo,

ukuze nazi, futhi ningikholwe,

niqonde ukuthi Mina nginguye.

Akukho nkulunkulu owenziwa ngaphambi kwami,

futhi akekho oyokwenziwa ngasemuva kwami.

₁₁Mina, Mina nginguSimakade,

ngaphandle kwami akekho uMsindisi.

₁₂Ngishilo, ngasindisa, ngamemezela,

ngesikhathi kungakabi bikho nkulunkulu

wabezizwe phakathi kwenu.

Nina ningofakazi bami,” kusho uSimakade.

“Mina nginguNkulunkulu.

₁₃Mina nginguye kwasemandulo.

Akekho ongakusindisa okusesandleni sami,

ngiyenza,

ngubani ongakuvimba lokho na?”

₁₄Usho kanje uSimakade uMhlengi wenu

oNgcwele ka-Israyeli, uthi:

“Ngenxa yenu ngithumele eBhabhele,

ngiyobehlisa bonke ababalekileyo,

namaKhaledi ngemikhumbi,

bememeza ngenjabulo.

₁₅Mina nginguSimakade oNgcwele wenu,

uMdali ka-Israyeli, iNkosi yenu.”

₁₆Usho kanje uSimakade

odala indlela olwandle,

nomkhondo emanzini anamandla,

₁₇okhipha izinqola zempi;

amahhashi, impi, namaqhawe,

kulale uyaca kanyekanye

kungabe kusavuka.

Kucishwe, kucinywe

njengentambo yesibani.

₁₈“Ningakhumbuli izinto zakuqala,

ningazindli ngezindaba zasendulo.

₁₉Bhekani, sengizokwenza okusha,

kuqhamuka khona manje;

niyakubona na?

Yebo, ngiyokwenza indlela ehlane,

nemifula kwahlongasibi.

₂₀Izilwane zasendle:

izimpisi nezintshe kuzongidumisa,

ngokuba ngiveze amanzi ehlane

nemifula kwahlongasibi,

ukuphuzisa abantu bami engibakhethileyo,

₂₁abantu engizidalele bona,

ukuze bamemezele udumo lwami.

₂₂“Nokho wena Jakobe, awuzange ungibize;

nawe Israyeli, udiniwe yimi.

₂₃Awuzilethanga kimi izimvu zakho

zomnikelo wokushiswa;

awungidumisanga ngemihlatshelo yakho;

angizange ngibe kuwe ngumthwalo ngeminikelo,

noma ngikukhathaze ngempepho.

₂₄Awungilethelanga ngamali ikhalamusi;

awungisuthisanga ngamanoni emihlatshelo yakho,

kodwa ungethwese umthwalo ngezono zakho,

wangikhathaza ngobubi bakho.

₂₅“Mina, Mina nginguye

owesula iziphambeko zakho

ngenxa yami;

angiyukuzikhumbula izono zakho.

₂₆Ngikhumbuze, masiqagulisane,

lubeke udaba lwakho,

ukuze kubonakale ukuthi awunacala.

₂₇Ukhokho wakho wokuqala wona,

nabakukhulumelayo baphambukile kimi.

₂₈Ngakho-ke ngizingcolisile izikhulu zendlu engcwele;

uJakobe ngizakumnikela ukuba achithwe,

no-Israyeli ukuba abe yisithuko.”