U-Izaya 42

₁“Bheka, inceku yami engiyesekayo,

okhethiweyo wami

othokoza ngaye umphefumulo wami;

ngibekile umoya wami phezu kwakhe,

uyakwenzela izizwe ubulungiswa.

₂Akayukukhala,

akayukuliphakamisa izwi lakhe,

akayukulizwakalisa izwi lakhe emigwaqweni.

₃Umhlanga ofecekileyo akayukuwaphula,

umongo othunqanyo akayukuwucima,

uyakwenza ukwehlulela ngokweqiniso.

₄Akayukudangala, aphele amandla,

aze amise ubulungiswa emhlabeni;

neziqhingi ziyolindela ukuyala kwakhe.”

₅Usho kanje uNkulunkulu uSimakade

owadala izulu, waleneka,

wendlala umhlaba nokuvela kuwo;

onika abantu abakuwo umphefumulo

nomoya kwabahamba kuwo, uthi:

₆“Mina Simakade ngikubize ngokulunga,

ngiyokubamba ngesandla sakho,

ngikulondoloze,

ngiyokwenza ube yisivumelwano sabantu,

nokukhanya kwabezizwe,

₇ukuze uvule amehlo ezimpumputhe,

ukhiphe iziboshwa ejele,

nabahlezi ebumnyameni ejele.

₈“NginguSimakade; yilelo igama lami;

angiyukumnika omunye inkazimulo yami,

nezithombe ezibaziweyo, udumo lwami.

₉Izinto zakuqala zifikile,

sengizakumemezela izinto ezintsha;

zingakaqhamuki, ngiyakunenza nizizwe.”

₁₀Mhubeleni uSimakade ihubo elisha,

indumiso yakhe kusukela emikhawulweni yomhlaba,

nina enehlela olwandle

nakho konke okukulo,

nina ziqhingi nabakhileyo kuzo.

₁₁Ihlane nemizi yalo makujabule,

nemizana okwakhe kuyo abakwaKedari,

abakhileyo eSela mabajabule bathokoze,

mabenanele beseziqongweni zezintaba.

₁₂Mabamnike uSimakade udumo,

bamemezele udumo lwakhe eziqhingini.

₁₃USimakade uyakuphuma njengeqhawe,

njengendoda yempi,

uyakuvusa ukushisekela kwakhe,

uyakumemeza ngezwi lokunqoba,

akhuze isiqubulo sempi

aziqonele izitha zakhe.

₁₄“Sengithule isikhathi eside;

ngizibambile ngathula.

Sengizokhala njengowesifazane ebeletha,

ngihefuzele, ngibitoze ngasikhathi sinye.

₁₅Ngiyakuchitha izintaba namagquma kube yize,

ngomise konke okumile kukho,

ngiyokwenza imifula ibe yiziqhingi,

ngishise amachibi.

₁₆Izimpumputhe ngiyozihambisa

ngendlela ezingayaziyo,

ngiyozihola emikhondweni ezingayaziyo,

ngiyophendula ubumnyama

bube ngukukhanya phambi kwazo,

amagebhugebhu ahlelembeke,

lezi zinto engiyozenza,

angiyukuyeka ngingazenzi.

₁₇Bayakubuyiselwa emuva,

bajabhe nokujabha labo abethembela

ezithombeni ezibaziweyo,

abathi ezithombeni ezibunjiweyo:

‘Ningonkulunkulu bethu.’

₁₈“Yizwani nina zithulu;

bhekani nina zimpumputhe,

ukuze nibone.

₁₉Ngubani oyimpumputhe

ngaphandle kwenceku yami,

nesithulu njengesithunywa sami

engiyosithuma na?

Ngubani oyimpumputhe njengozinikele kimi,

noyimpumputhe njengenceku kaSimakade na?

₂₀Ubonile izinto eziningi,

kodwa awuqaphelanga;

nezindlebe zakho zivulekile,

kodwa awuzwanga.”

₂₁Kwaba kuhle kuSimakade

ngenxa yokulunga kwakhe,

ukuba aphakamise umthetho wakhe,

awenze uhlonipheke.

₂₂Kodwa laba bangabantu abaphuciweyo baphangwa;

bonke bacushwe emigodini,

bafihlwa emajele;

bangabokuphangwa,

akekho obasindisayo,

bayimpango,

akekho nothi:

“Buyisa.”

₂₃Ngubani phakathi kwenu

oyobeka indlebe kulokhu,

aqaphele, ezwe okwesikhathi esizayo na?

₂₄Ngubani owanikela uJakobe

ukuba aphangwe,

no-Israyeli kubaphangi na?

Akusiye yini uSimakade lona esonile kuye,

abangavumanga ukuhamba ngezindlela zakhe,

nokulalela umthetho wakhe na?

₂₅Wathela phezu kwakhe

ukufutheka kwentukuthelo yakhe,

nesihluku sempi;

kwavutha nxazonke,

kodwa akaqondanga;

kwashisa,

nokho akazange

akubeke enhliziyweni yakhe.