U-Izaya 17

“Yazini ukuthi iDamaseku liyoshatshalaliswa,

lingabe lisaba ngumuzi,

libe yinxiwa nencithakalo.

₂Imizi e-Aroweri iyakushiywa

ibe ngeyemihlambi;

ibuthise khona,

ingethuswa muntu.

₃Kuyobhidlika inqaba kwa-Efrayimi,

nombuso eDamaseku,

nensali e-Aramu,

kube njengodumo lwabantu bakwa-Israyeli,”

kusho uSimakade Wamabandla.

₄“Ngalolo lusuku

udumo lukaJakobe luyodanjiswa,

kuphele ukukhuluphala

emzimbeni wakhe, azace.

₅Kuyoba njengomuntu evuna amabele

emazimbeni asamile,

nengalo yakhe ivuna izikhwebu,

nanjengokhothozayo esigodini samaRefa.

₆Umkhwanyo uyosala

njengokusale kuwohlozwa iminqumo:

izithelo ezimbili noma ezintathu

ezihlokweni phezulu,

ezine noma ezinhlanu

emagatsheni omuthi,”

kusho uSimakade uNkulunkulu ka-Israyeli.

₇Ngalolo lusuku abantu bayomfuna uMdali wabo,

amehlo abo agqolozele oNgcwele ka-Israyeli.

₈Abasayukuwanaka ama-althare abo,

umsebenzi wezandla zabo,

abasayukuwubheka kulokho

okwenziwe yiminwe yabo,

o-Ashera nama-althare empepho.

₉Ngalolo lusuku imizi ebiyelweyo

iyofana namanxiwa asehlathini

naseziqongweni zezintaba,

eyashiwa ngabantu bakwa-Israyeli,

yaba yincithakalo.

₁₀Ngokuba umkhohliwe uNkulunkulu wensindiso yakho,

awulikhumbulanga iDwala ophephela kulo,

ngalokho-ke noma utshala izithombo zekhethelo,

uhlwanyele amahlumela angaziwayo,

₁₁noma ungazenza zikhule ngosuku

ezitshalwe ngalo,

wenze okuhlwanyelweyo kuqhakaze ngakusasa,

nokho akuyukuba khona sivuno

ngalolo lusuku lokulila

nobuhlungu obungelapheki.

₁₂Maye, ukuhlokoma kwezizwe eziningi,

zihlokoma njengokuduma kolwandle;

nomsindo wokuxokozela kwabezizwe,

unjengokuhlokoma kwamanzi amaningi.

₁₃Izizwe zihlokomisa okwamanzi amaningi,

kodwa uyakuzijezisa,

zibalekele kude,

zixoshwe njengamakhoba

epheshulwa ngumoya ezintabeni,

nanjengothuli lupheshulwa yisiphepho.

₁₄Ngokuhlwa, kuba yingebhe yodwa;

kuthi kungakasi zibe zingasekho.

Yileso-ke isabelo sabasiphangayo,

nonkatho lwabasiqhwagayo.