U-Izaya 10

₁Maye, kulabo abashaya imithetho engalungile,

nababhala izimiso ezikhathazayo,

₂ukuhlanekezela ubulungiswa kwabantulayo,

nokuqola abantu bami abampofu

amalungelo abo,

ukuze abafelokazi babe yimpango yabo,

nezintandane zibe yisisulu sabo.

₃Niyokwenzenjani ngosuku lokwehlulela,

lapho nehlelwa yinhlekelele

evela kude na?

Niyobalekela kubani ukuba anisize na?

Niyowushiya kuphi umcebo wenu na?

₄Maningacashi phakathi kwabathunjiweyo,

noma phakathi kwababuleweyo,

ngoba kukho konke lokhu,

ulaka lukaSimakade alukabohli,

nangesandla sakhe usashaya.

₅“Maye, kulo i-Asiriya,

intonga yentukuthelo yami,

induku esesandleni salo iyintukuthelo yami.

₆Ngiyithuma esizweni esingenabunkulunkulu,

ngiyijube ukubhekana

nabantu engibathukuthelele

ukuba ibaphange impango,

iqhwage impahla,

ibaxove njengodaka emigwaqweni.

₇Kodwa akusikho lokho

ama-Asiriya akuhlosile,

futhi akukhona lokhu akucabangayo.

Okusenhliziyweni yawo

ukubhubhisa nokushabalalisa izizwe eziningi.

₈Ngokuba azishaya isifuba, ethi:

‘Ngabe bonke abakhuzi bempi bami

abasiwo amakhosi na?

₉IKhalino alinjengeKharikhemishi na?

IHamathi alinjenge-Ariphadi na?

ISamariya alinjengeDamaseku na?

₁₀Njengoba isandla sami

sifinyelele emibusweni yezithombe,

ezithombe zayo zazingaphezu

kwalezo eziseJerusalema naseSamariya.

₁₁Angiyukwenza yini kulo iJerusalema

nezithombe zalo,

lokho engikwenzile kulo iSamariya

nezithombe zalo na?’ ”

“Zonke lezi zinto

ngizenze ngamandla ami,

nangokuhlakanipha kwami,

ngokuba nginokuqonda;

ngiyisusile imingcele yezizwe,

ngaphanga ingcebo yazo;

njengesiqhwaga ngiziqumbe phansi izakhamuzi.

₁₄Isandla sami sithole umcebo wezizwe;

njengomuntu ebutha amaqanda

ashiywe esidlekeni senyoni,

nami ngiwubuthe kanjalo-ke umhlaba wonke.

Akubangabikho lutho olwake lwathi nyaka,

nolwathi nkente,

nolwake lwathi tshiyo.”

₁₅Izembe lingaziqhayisa yini

kuye ogawula ngalo,

nesaha lingazikhukhumeza yini

kosaha ngalo na?

Induku ingamphakamisa yini oyiphakamisayo,

nentonga lokho okungesilo ukhuni na?

₁₆Ngakho iNkosi uSimakade Wamabandla

izothumela isifo esincunzayo

phakathi kwamabutho akhe akhulupheleyo,

iphembe umlilo ngaphansi kwenkazimulo yayo

umlilo uvuthe.

₁₇Ukukhanya kuka-Israyeli kuyakuba ngumlilo,

kuthi oNgcwele ka-Israyeli abe yilangabi;

kuyakushisa kuqothule ameva namakhakhasi akhe

ngalusuku lunye.

₁₈Iyoqeda ubuhle behlathi lakhe

nensimu yakhe,

njengomzimba wogulayo uncunzwa wukufa.

₁₉Insali yemithi yehlathi lakhe

iyokuba yingcosana,

ukuze ibalwe nangumntwana omncane.

₂₀Kuyothi ngalolo lusuku,

insali yabakwa-Israyeli

nabasindileyo bendlu kaJakobe,

bangabe besathembela kulowo obashayileyo,

kodwa bayokwethemba ngeqiniso uSimakade

oNgcwele ka-Israyeli.

₂₁Insali iyobuya:

insali kaJakobe, ibuyele kuNkulunkulu uSomandla.

₂₂Ngisho noma abantu bakho, Israyeli,

bebengangesihlabathi solwandle,

kuyobuya imithonseyana phakathi kwabo,

ngoba ukubhujiswa kubahlalele;

nokulunga kuyachichima.

₂₃Ngokuba iNkosi uSimakade Wamabandla

uyokuphelelisa ukubhujiswa

osekunqunywe emhlabeni wonke.

“Bantu bami, enihlala eZiyoni,

ningabesabi abase-Asiriya

lapho benishaya ngentonga yabo,

bephakamisa induku yabo ukumelana nani,

njengoba kwenza abaseGibhithe.

₂₅Ngokuba ngesikhashana nje

izokwehla intukuthelo yami,

ulaka lwami kube ngolokubhujiswa kwabo.”

₂₆USimakade Wamabandla uzobaxebula ngenkalivasi

njengoba enza mhla eshaya abakwaMidiyani

ngasedwaleni i-Orebhi,

nentonga yakhe iyakuba phezu kolwandle;

uyakuyiphakamisa njengoba enza eGibhithe.

₂₇Kuyothi ngalolo lusuku

umthwalo wabo uyakususwa emahlombe akho,

nejoka labo entanyeni yakho,

ijoka liyonqamuka ngenxa yokunona.

ledlula eMigroni;

lethula impahla yalo eMikhimashi,

₂₉badlula entubeni,

ebusuku bahlala eGebha;

iRama liyathuthumela,

iGibheya likaSawule lithi galo yephuka.

₃₀Khamuluka ndodakazi yaseGalimi;

qaphela Layishi,

yiphendule Anathothi.

₃₁IMadimena selibalekile,

izakhamuzi zaseGebhimi sezibhacile.

₃₂Namuhla izokanisa eNobhi,

izakuzivocavocela intaba yendodakazi yaseZiyoni

negquma eJerusalema, isibhakela sayo.

₃₃INkosi uSimakade Wamabandla

iyonquma amagatsha ngesihluku,

kudicilelwe phansi abaphakemeyo,

nabazikhukhumezayo behliswe.

₃₄Ihlozi lehlathi liyogencwa ngembazo,

neLebhanoni liyowa ngenxa yoNamandla.