UHoziya 2

₂“Phikisanani nonyoko,

nimmangalele,

ngokuba akayena umkami,

nami angiyona indoda yakhe.

Makasuse ubufebe bakhe ebusweni bakhe,

nokuphinga kwakhe phakathi kwamabele akhe,

₃funa ngimhlubule abe nqunu,

ngimbhushuzelise njengosuku azalwa ngalo,

ngimenze afane nehlane,

abe njengezwe eligagadekile,

bese ngimbulala fi ngokoma.

₄Angiyukubazwela abantwana bakhe,

ngokuba bangabantwana bobufebe.

₅Unina wazifebela,

wabakhulelwa ngokwenza ihlazo,

ngokuba wathi ngizakuhamba

ngilandele izithandwa zami,

ezingipha isinkwa sami namanzi ami,

uboya bami bezimvu nefilakisi lami,

amafutha ami nokuphuzwayo kwami.

₆Ngakho-ke bhekani,

ngizoyivala indlela yakho,

ngakhe ugange ngameva oluzomvimbela

nendlela yakhe angayitholi.

₇Uyakulandela izithandwa zakhe,

kodwa akayukuzifica,

uyakuzifuna kepha akayukuzifumana,

bese ethi:

“Ngiyakuhamba ngibuyele endodeni yami yokuqala,

ngokuba kwakukuhle kimi

ngalezo zinsuku kunamanje.”

₈Kepha ubengazi ukuthi yiMina

obemhlinzeka ngokusanhlamvu,

ngewayini elisha, ngesiliva,

ngamandisela negolide, abakusebenzisa kuBhali.

₉“Ngakho-ke ngiyakubuya

ngithathe okwami okusanhlamvu ngesikhathi sakho

newayini lami elisha ngesikhathi salo,

ngithathe uboya bami bezimvu

nefilakisi lami lokwemboza ubunqunu bakhe.

₁₀Manje-ke sengizokwembula ihlazo lakhe

zizibonela ngawazo amehlo izithandwa zakhe,

futhi akukho namunye

oyakumhlenga esandleni sami.

₁₁Ngiyakuyiqeda nya yonke

imigubho yakhe yentokozo,

eyokwethwasa kwenyanga,

amasabatha akhe,

nawo wonke amadili akhe anqunyiweyo.

₁₂Ngiyakucekela phansi imivini yakhe

nemikhiwane yakhe,

athe ngakho:

‘Kuyinkokhelo yami ezinginike yona

izithandwa zami;’

ngizokwenza kube yihlozi,

izilwane zasendle zikudle.

₁₃Ngiyakumjezisela izinsuku zoBhali

lezo ayebashisela ngazo impepho,

ezihlobisa ngezindandatho zakhe

nangobucwebecwebe bakhe,

elandela izithandwa zakhe,

wangikhohlwa Mina,” kusho uSimakade.

₁₄“Ngakho-ke bhekani,

ngiyakumyenga, ngimholele ehlane,

ngikhulume enhliziyweni yakhe.

₁₅Kulapho-ke ngiyakumnika izivini zakhe,

nesigodi i-Akhori

sibe ngumnyango wethemba.

Uyakuphendula lapho

njengasezinsukwini zobusha bakhe,

nanjengosuku lokukhuphuka kwakhe eGibhithe.

₁₆“Kuyakuthi ngalolo lusuku ungibize uthi:

‘Myeni wami,’

ungaphinde ungibize futhi ngokuthi:

‘Bhali wami,’ kusho uSimakade.

₁₇“Ngiyakususa amagama oBhali emlonyeni wakhe,

abasayukukhunjulwa ngamagama abo.

₁₈Ngalolo lusuku ngiyakubenzela

isivumelwano nezilwane zasendle,

nezinyoni zezulu,

nokuhuquzelayo emhlabathini.

Ngiyakunqamula umnsalo,

inkemba nempi ezweni,

ngibalalise phansi bephephile.

₁₉Ngiyakuzithathela wena

ube ngumkami kwaphakade,

ngizithathele wena ngokulunga,

ngobulungiswa, ngomusa nangesihawu.

₂₀Ngiyakuzithathela wena ngokwethembeka,

futhi uyakumazi uSimakade.

₂₁Kuyakuthi ngalolo lusuku ngiphendule,

ngiyakuphendula amazulu,

wona aphendule umhlaba,” kusho uSimakade.

₂₂“Umhlaba uyakuphendula okusanhlamvu,

iwayini elisha namafutha amasha,

khona kuyakuphendula iJezreyeli.

₂₃Ngiyakuzitshalela yena ezweni,

ngihawukele ongahawukelwanga,

ngithi kwabangesibo abantu bami:

‘Ningabantu bami,’

bona bayakuthi:

‘UnguNkulunkulu wethu.’ ”