I-Eksodusi 28

₁“Biza u-Aroni umfowenu phakathi kwabantu bakwa-Israyeli namadodana akhe, uNadabi, u-Abhihu, u-Eleyazare no-Ithamari beze kuwe, ukuba babe ngabaphristi bami bangikhonze. ₂Uyakumthungela u-Aroni umfowenu izingubo ezingcwele, ezinhle nezokuzihlobisa. ₃Uyakukhuluma kubo bonke abanekhono, engibaphile ikhono ukuba bathungele u-Aroni izingubo ukuze ahlukaniswe abe ngumphristi wami, angikhonze. ₄Yilezi izingubo abayozithunga: isivikelo sesifuba, ingubo yamahlombe, ingubo, ibhantshi elihlotshisiweyo, umshuqulo, nombhunkulo. Lapho bethungela u-Aroni namadodana akhe lezi zingubo ezingcwele ukuze bangikhonze bengabaphristi, ₅bayosebenzisa okuyigolide, okuluhlaza okwesibhakabhaka, okubukhwebezane, okubomvu, nelineni elicolekileyo.

₆“Bayokwenza ingubo yamahlombe ngokuyigolide, ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo, kube ngumsebenzi wobungcweti obukhulu. ₇Iyakuba neziziba ezimbili zasemahlombe ezihlanganisiwe emachosheni azo ukuze zikwazi ukubopheka. ₈Ibhande elikuyo liyokwenziwa ngobuciko obufanayo ngokuyigolide, ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo. ₉Uyothatha amatshe amabili aligugu i-oniksi, uqophe kuwo amagama ali-12 amadodana ka-Israyeli; ₁₀amagama ayisithupha etsheni elilodwa, namanye ayisithupha kwelinye itshe njengokwelamana kwawo. ₁₁Njengomqophi eqopha isisicilelo, uyowaqopha lawa matshe amabili ngamagama amadodana ka-Israyeli, bese uwafaka azungezwe yizisekelo zegolide. ₁₂Uyowabeka lawa matshe ezizibeni zengubo yamahlombe njengesikhumbuzo samadodana ka-Israyeli, bese u-Aroni awembathe amagama abo emahlombe akhe phambi kukaSimakade kube yisikhumbuzo. ₁₃Uyokwenza izisekelo zegolide, ₁₄namaketanga amabili egolide elicwengekileyo, uwenze abe njengamagoda, uwathandele ezisekelweni zegolide.

₁₅“Uyokwenza isivikelo sesifuba sokwehlulela, ngobungcweti, uyakusenza ngendlela okwenziwe ngayo ingubo yamahlombe, sibe yigolide, okuluhlaza okwesibhakabhaka, okubukhwebezane, okubomvu, nokwelineni lemicu ephothiweyo elicolekileyo. ₁₆Siyakuba yisikwele, siphindwe kabili, ubude nobubanzi baso bube ngangokuvuleka kwesandla. ₁₇Uyofaka kuso imigqa emine yamatshe. Kuyokuba ngumugqa onerubhi, yithophazi nebherili; ₁₈emugqeni wesibili; kube yithurikhosi, yisefaya, ne-emeraldi; ₁₉emugqeni wesithathu; kube yijasinithe, yi-agathe, ne-amethiyisti; ₂₀emugqeni wesine kube yikhrisolithe, yi-oniksi, nejasipheri, konke lokhu kuzungezwe ngezisekelo zegolide. ₂₁Kuyakuba ngamatshe ali-12 ngangesibalo samagama amadodana ka-Israyeli. Ayofana nezisicilelo, yilelo nalelo liqoshwe igama lesizwe ngasinye kwezili-12. ₂₂Uyokwenza kuso isivikelo sesifuba amaketanga egolide anjengamagoda aphothiweyo. ₂₃Wenze kuso amasongo amabili egolide, uwanamathelise emachosheni esivikelo sesifuba. ₂₄Uyofaka amaketanga amabili egolide nezintambo zegolide emasongweni omabili esivikelo sesifuba asemaceleni. ₂₅Amachopho amabili amagoda, uyowathandela ezisekelweni bese uwathandela phambili ezizibeni zengubo yamahlombe. ₂₆Uyokwenza amasongo amabili egolide, uwafake emachosheni omabili esivikelo sesifuba, engxenyeni engaphakathi eseduze nengubo yamahlombe. ₂₇Uyokwenza amasongo amabili egolide, uwafake phambili emachosheni omabili omphetho wengubo yamahlombe kuthi okuhlanganisiwe kube phezu kwebhande elihlotshisiweyo. ₂₈Isivikelo sesifuba siyoboshwa ngamasongo aso, siboshelwe emasongweni engubo yamahlombe ngentambo eluhlaza okwesibhakabhaka, ukuze sibe phezu kwebhande lengubo yamahlombe elifekethisiweyo, nokuba isivikelo sesifuba singakhumuki engutsheni yamahlombe.

₂₉“U-Aroni uyokwembatha amagama amadodana ka-Israyeli esivikelweni sesifuba sokwehlulela esiqondene nenhliziyo yakhe, lapho engena endaweni engcwele, kube yisikhumbuzo esingapheliyo phambi kukaSimakade. ₃₀Uyofaka esivikelweni sesifuba sokwehlulela, i-Urimi neThumimi, kuyakuba ngasenhliziyweni ka-Aroni lapho engena phambi kukaSimakade, ngakho-ke u-Aroni uyakuthwala njalo enhliziyweni yakhe phambi kukaSimakade, ukwehlulelwa kwabakwa-Israyeli.”

₃₁“Uyokwenza ingubo emboza ingubo yamahlombe ngokuluhlaza okwesibhakabhaka, ₃₂iyakuba nembobo yekhanda phakathi nayo, ibe nomphetho owelukiweyo oyizungezile le mbobo, njengembobo yebhantshi lensimbi ukuze ingadabuki. ₃₃Emphethweni wayo ongezansi uyofaka amahananadi enziwe ngokuluhlaza okwesibhakabhaka, ngokubukhwebezane, nangokubomvu, kuwuzungeze wonke umphetho wayo, kube nokhencekhence begolide phakathi kwawo, ₃₄kube yisikhencezo segolide nehananadi kuzungeze umphetho wengubo. ₃₅U-Aroni uyakuyigqoka njalo uma eyokhonza, ukukhenceza kwayo kuyozwakala lapho eya endaweni engcwele phambi kukaSimakade, nalapho ephuma, ukuze angafi.

₃₆“Uyokwenza ucwecwe lwegolide elicwengekileyo, uqophe kulo njengokuqoshwa kwendandatho, ukuthi: ‘Wehlukaniselwe uSimakade.’ ₃₇Uyolubophela emshuqulweni ngentambo eluhlaza okwesibhakabhaka, lube phambi kwalo. ₃₈Luyokuba sebunzini lika-Aroni. U-Aroni uyakuthwala icala lanoma yimuphi umnikelo ongcwele, abantu bakwa-Israyeli abawehlukanisa njengomnikelo ongcwele, luyohlala njalo ebunzini lakhe ukuze bamukeleke phambi kukaSimakade.

₃₉“Uyokweluka ibhantshi ngelineni elicolekileyo, nomshuqulu ngelineni elicolekileyo, nebhande elifekethisiweyo. ₄₀Uyowathungela amabhantshi amadodana ka-Aroni, amabhande, nezigqoko, kube ngawokuhloba kwawo. ₄₁Uyokugqokisa u-Aroni, umfowenu namadodana akhe. Uyobagcoba, ubabeke, ubangcwelise ukuba bangikhonze bengabaphristi.

₄₂“Uyobenzela namabhulukwe elineni ukuze kufihlwe ubunqunu babo, asuke okhalo aze afinyelele emathangeni. ₄₃U-Aroni namadodana akhe bayowagqoka lapho bengena ethendeni lokuhlangana, nalapho besondela e-althare ukuyokhonza endaweni engcwele, uma bengenzi kanjalo bayakuzithwesa icala, bafe. Lokhu kuyakuba yisimiso saphakade kuye nasezizukulwaneni zakhe kuze kube phakade.