IDutheronomi 14

₁“Ningabantu bakaSimakade uNkulunkulu wenu; aniyukuzisika, aniyukuwaphuca amashiya enu ngenxa yofileyo. ₂Ngokuba ningabantu abangcwele kuSimakade uNkulunkulu wenu. Unikhethile ukuba nibe yisizwe esiyifa lakhe phakathi kwezizwe zonke ezisebusweni bomhlaba.

₃“Ungayidli noma yini enengekayo. ₄Nazi izilwane eniyakuzidla: inkomo, imvu, imbuzi, ₅indluzele, insephe, inyala, impala, impalampala, iwula, negogo. ₆Niyakuzidla zonke izilwane ezinezinselo ezihlukene, ezinezinselo ezihlukene kabili, nezetshisayo phakathi kwezilwane. ₇Kepha lezi aniyukuzidla kulezo ezetshisayo nezehlukene izinselo: ikamela, unogwaja, nembila, ngokuba ziyetshisa, azehlukene izinselo; zingcolile kini, ₈nengulube, nakuba yehlukene izinselo, kodwa ayetshisi; ingcolile kini; aniyukuyidla inyama yazo, aniyukuzithinta izidumbu zazo.

₉“Kuzo zonke ezisemanzini, nazi eniyozidla: zonke ezinamaphiko nezingcwecwe. ₁₀Kepha zonke ezingenawo amaphiko nezingcwecwe aniyukuzidla; zingcolile kini.

₁₁“Niyodla zonke izinyoni ezihlambulukileyo. ₁₂Kodwa yilezi eningayukuzidla: ukhozi, inqe, ingqungqulu, ₁₃isiphungumangathi, uheshe, unhloyile ngezinhlobo zakhe, ₁₄amagwababa wonke ngezinhlobo zawo, ₁₅intshe, inkovana, inkanku, uklebe ngezinhlobo zakhe, ₁₆isikhova, umxwagele, ifukezi, ₁₇ivuba, uphalane, umphishamanzi, ₁₈unogolantethe, unozalizingwenya ngezinhlobo zakhe, uziningweni, nelulwane.

₁₉“Zonke izilwanyana ezinamaphiko zingcolile kini: aniyukuzidla. ₂₀Kepha zonke ezinamaphiko ezihlambulukileyo niyozidla.

₂₁“Aniyukuyidla ingcuba; aniyukumnika umfokazi osemzini wenu ukuba ayidle, noma nithengise ngayo kowezizwe, ngokuba nina niyisizwe esingcwele kuSimakade uNkulunkulu wenu. Aniyukupheka izinyane lembuzi ngobisi lukanina.”

₂₂“Uyonikela okweshumi kwezithelo zonke zembewu yakho, ezivela ensimini unyaka nonyaka. ₂₃Uyokudla phambi kukaSimakade uNkulunkulu wakho endaweni ayoyikhetha ukuba igama lakhe lihlale kuyo, okweshumi kokusanhlamvu kwakho, okwewayini lakho, okwamafutha akho, okwamazibulo ezinkomo zakho, nokwezimvu zakho, ukuze ufunde ukumesaba njalo uSimakade uNkulunkulu wakho. ₂₄Uma indlela iyinde kakhulu kuwe ukuba ungakwazi ukukuthwala, nendawo lapho uSimakade uNkulunkulu wakho akhethe ukubeka kuyo igama lakhe ikude kakhulu kuwe, lapho uSimakade uNkulunkulu wakho ekubusisa, ₂₅uyakukwenana ngemali, uyisonge imali esandleni sakho, uye endaweni uSimakade uNkulunkulu wakho ayoyikhetha. ₂₆Uyothenga ngaleyo mali noma yini inhliziyo yakho eyithandayo: izinkabi, izimvu, iwayini, uphuzo olunamandla, noma yini efunwa yinhliziyo yakho, uyodla lapho phambi kukaSimakade uNkulunkulu wakho, uthokoze, wena nabendlu yakho; ₂₇nomLevi ophakathi kwamasango akho awuyukumlahla, ngokuba akanasabelo nafa nawe.

₂₈“Ngasekupheleni kweminyaka emithathu uyokhipha njalo konke okweshumi kwezithelo zakho ngalowo nyaka, nikugcine emizini yenu; ₂₉nomLevi, lokhu engenasabelo nafa nawe, umfokazi, intandane, nomfelokazi, abasemizini yenu. Bayoza, badle, basuthe ukuze uSimakade uNkulunkulu wenu anibusise emsebenzini wonke wesandla senu eniwenzayo.”