UBharukhi 5

₁“Jerusalema, zithukulule izambatho zakho zosizi nokuhlupheka, wembathe ubuhle benkazimulo kaNkulunkulu ingunaphakade. ₂Yembatha ingubo yokulunga evela kuNkulunkulu; thwala ekhanda lakho umqhele wenkazimulo yoNgunaphakade, ₃ngokuba uNkulunkulu uyakuqhakambisa ubuhle benu noma yikuphi phansi komthunzi welanga. ₄Ngokuba uNkulunkulu uyakukunika ingunaphakade igama elithi: ‘Ukuthula okulungileyo, neNkazimulo yokumesaba uNkulunkulu.’

₅“Vuka, Jerusalema, yima eziqongweni; ubheke ngasempumalanga, ubone abantwana bakho beqoqwa entshonalanga nasempumalanga, ngokuba oNgcwele ukhulumile, beza bejabula ngoba uNkulunkulu ebakhumbulile. ₆Ngokuba baphuma kuwe ngezinyawo, beholwa yizitha zabo, kodwa uNkulunkulu uyakubabuyisela kuwe, bebuya ngodumo, njengobuyela esihlalweni sobukhosi. ₇Ngokuba uNkulunkulu uyalile ukuthi zonke izintaba eziphakemeyo nezintaba zaphakade zihlelenjwe nemigoxi igcwaliswe, yenziwe amathafa, ukuze u-Israyeli ahambe ngokuphephile ngodumo lukaNkulunkulu.

₈“Amahlathi nazo zonke izihlahla ezinuka amakha zimkhoselise u-Israyeli njengokuyala kukaNkulunkulu. ₉Ngokuba uNkulunkulu uyakumhola u-Israyeli ngentokozo, ekukhanyeni kwenkazimulo yakhe, uyakumhola ngesihawu nangobulungisa obuvela kuye uqobo.”