2 KwabaseKhorinte 12

₁Kumele ukuba ngizigabise noma kungasizi ngalutho lokho, kodwa sengizakukhuluma ngemibono nezambulo zeNkosi. ₂Ngiyamazi umuntu owayekuKhristu, okwathi eminyakeni eli-14 eyedlulile, noma wayesemzimbeni, angazi, noma wayengaphandle komzimba, angazi; nguNkulunkulu owaziyo; lo muntu wahlwithwa, wenyuselwa ezulwini lesithathu. ₃Yebo, ngiyamazi umuntu onjalo, noma wayesemzimbeni, noma wayengaphandle kwawo, angazi; nguNkulunkulu owaziyo; ₄ngiyazi ukuthi wahlwithwa, wayiswa ePharadisi, wezwa amazwi angakhulumeki; okungavunyelwe ukuba umuntu awakhulume. ₅Ngizakuzigabisa ngomuntu onjalo, kodwa mina luqobo angizukuzigabisa ngalutho, ngaphandle kobuthakathaka bami. ₆Ngokuba uma ngifuna ukuzigabisa, bengingezukuba yisiwula, ngokuba bengizobe ngikhuluma iqiniso. Kepha ngiyayeka, funa umuntu acabange ngami ngokungaphezu kwalokho angibona ngiyikhona nakuzwa ngami, ₇ikakhulu uma umuntu ezwa ngemibono yami exakileyo. Ngakho-ke ukuze ngingaziphakamisi kakhulu, nganikwa iva emzimbeni, ukuba ingelosi kaSathane ingimukule, funa ngiziphakamise kakhulu. ₈Mayelana nalokhu, ngayinxusa iNkosi, amahlandla amathathu, ukuba ilisuse kimi. ₉Kodwa yathi kimi: “Umusa wami ukwanele, ngokuba amandla ami ayapheleliswa ebuthakathakeni.”

Ngakho-ke kunalokho ngiyakujabulela ukuzigabisa ngobuthakathaka bami, ukuze amandla kaKhristu ahlale phezu kwami. ₁₀Ngalokho ngiyathokoza ebuthakathakeni bami, ekwedelelweni, ebunzimeni, ekuhlushweni, nasebunzimeni bonke ngenxa kaKhristu, ngokuba uma ngibuthakathaka, kulapho-ke nginamandla khona.

₁₁Sengize ngaba yisiwula; nina ningiphoqile. Ngokuba mina kufanele ngabe nginconywa yinina. Angisilele ngalutho kubaphostoli abaqavile kakhulu, noma ngingento yalutho. ₁₂Impela izibonakaliso zobuphostoli zenziwe kini ngokubekezela konke, ngezibonakaliso, ngezimangaliso, nangemisebenzi yamandla. ₁₃Ngokuba yikuphi eningenzelwanga khona kunamanye amabandla, uma kungeyisikho ukuthi mina angibanga mthwalo kini na? Ngithetheleleni-ke lelo cala.

₁₄Sekungokwesithathu manje ngikulungele ukuza kini; angiyukuba mthwalo kini, ngokuba angifune zinto zenu, kodwa ngifuna nina. Ngokuba akusibona abantwana okufanele baqongelelele abazali, kodwa ngabazali abaqongelelela abantwana. ₁₅Kepha ngizakunikela ngokujabula okukhulu, nginikele ngakho konke, nangami uqobo, ngenxa yemiphefumulo yenu. Pho uma nginithanda kakhulu ngabe kufanele mina ngithandwe kancane yini na? ₁₆Kepha makube ngukuthi angibanga mthwalo kini, kodwa nibalisa ngokuthi ngaba yiqili, nganilutha ngobuqili. ₁₇Ngake nganiqola yini ngomunye walabo engabathumela kini na? ₁₈Ngamnxusa uThithu, ngathumela kanye naye umzalwane. UThithu wake waniqola yini na? Asihambanga ngamoya munye, nangendlela efanayo yini na?

₁₉Ngabe sonke lesi sikhathi nicabanga ukuthi sizama ukuzivikela yini kini? Sikhuluma sikuKhristu naphambi kukaNkulunkulu. Konke esikwenzayo, bazalwane, kungokokwakha nina. ₂₀Ngokuba nginovalo lokuthi lapho ngifika kini, mhlawumbe ngizakunifumana ningenjengalokho engikulindele, nami ningifumane nginjengalokho eningakulindele. Nginovalo, hleze kube khona ukuphikisana, umona, ukuthukuthela, imibango, ukuhleba, ukuzikhukhumeza nezinxushunxushu, ₂₁funa kuthi ekufikeni kwami futhi, uNkulunkulu wami angithobise phambi kwenu, ngililele abaningi abebekade bonile, bengaphendukanga kulokho abakwenzileyo, ekungcoleni, ebufebeni, nasemanyaleni.