2 IZikhronike 9

₁Kwathi indlovukazi yaseShebha seyizwile ngodumo lukaSolomoni, yasuka yaya eJerusalema ukuba iyovivinya uSolomoni ngezimfumbe. Yayinehele elikhulu kakhulu, amakameli ayethwele amakha, igolide eliningi, namatshe ayigugu. Yafika kuSolomoni yakhuluma naye ngakho konke okusenhliziyweni yayo. ₂USolomoni wayiphendula kukho konke eyambuza khona, akukho lutho olufihlakeleyo uSolomoni angakwazanga ukuyichachisela khona. ₃Indlovukazi yaseShebha isibonile ukuhlakanipha kukaSolomoni, nendlu ayeyakhile, ₄ukudla okusetafuleni lakhe, indlela izinceku zakhe ezazihlala ngayo, nezazima ngayo, izembatho zazo, abaphathizitsha nezembatho zabo, negumbi lakhe eliphezulu endlini kaSimakade, ayibange isaba nalutho olunye engalusho. ₅Yathi enkosini: “Konke engikuzwe ngawe ezweni lakithi kuliqiniso, mayelana namazwi akho nangokuhlakanipha kwakho. ₆Kepha angikholwanga ngamazwi abo, ngaze ngafika, ngazibonela ngamehlo ami; angitshelwanga ngisho ingxenye yobukhulu bokuhlakanipha kwakho. ₇Babusisiwe abantu bakho, zibusisiwe lezi zinceku zakho ezihlala zimi njalo phambi kwakho, zizwa ukuhlakanipha kwakho. ₈Makabongwe uSimakade uNkulunkulu wakho okwaba kuhle kuye ukuba akubeke esihlalweni sakhe sobukhosi, ube yinkosi kuSimakade uNkulunkulu wakho. Ngokuba uNkulunkulu wakho uyamthanda u-Israyeli futhi uyathanda ukummisa kuze kube phakade, yingakho ekubeke waba yinkosi phezu kwakhe, ukuba wenze ubulungiswa nokulunga.”

₉Indlovukazi yaseShebha yanika inkosi amathalenta egolide ayi-120, amakha amaningi kakhulu, namatshe ayigugu; akukho omunye owake wanika inkosi uSolomoni amakha amaningi njengalawo awaphiwa yindlovukazi yaseShebha.

₁₀Izinceku zikaHuramu nezinceku zikaSolomoni ezabuya negolide e-Ofiri, zaletha imi-alimugi namatshe ayigugu. ₁₁Inkosi yakha izikhwelo zendlu kaSimakade nezesigodlo ngemi-alimugi, yakha amahabhu, nezingubhu zabahlabeleli okungakaze kubonwe okunjengakho phambilini kwaJuda.

₁₂Inkosi uSolomoni yanika indlovukazi yaseShebha konke ekufunayo neyakucelayo, ngaphandle kwalokho eyayikulethe enkosini. Yasuka yabuyela ezweni layo nezinceku zayo.

₁₃Isisindo segolide elalilethwa kuSolomoni minyaka yonke lalingamathalenta angama-666 egolide, ₁₄ngaphandle kwalelo elalifika nabahwebi nabathengisi, nawo wonke amakhosi ase-Arabhiya, nababusi bezwe ababeletha igolide nesiliva kuSolomoni.

₁₅Inkosi uSolomoni yenza izihlangu zegolide elicangcathiweyo ezingama-200, isihlangu ngasinye singamashekeli egolide elicangcathiweyo angama-600. ₁₆Yakhanda futhi nezihlangu zegolide elicangcathiweyo ezingama-300; isihlangu ngasinye singamashekeli egolide elicangcathiweyo angama-300; inkosi yazibeka eNdlini Yehlathi eLebhanoni.

₁₇Inkosi yenza isihlalo sobukhosi esikhulu ngezimpondo zendlovu, yasicaka ngegolide elicwengekileyo. ₁₈Isihlalo sobukhosi sasinezikhwelo eziyisithupha, sinesenabelo segolide esasinamatheliswe esihlalweni sobukhosi, nemikhono ngalapha nangalapha kwendawo yokuhlala, kumi izingonyama ezimbili eceleni kwemikhono. ₁₉Kwakumi izingonyama ezili-12 ngalapha nangalapha kwezikhwelo eziyisithupha. Akukho okunjengalokhu okwake kwenziwa kweminye imibuso. ₂₀Zonke izitsha zokuphuza zenkosi uSolomoni zaziyigolide, nazo zonke izitsha ezaziseHlathini eLebhanoni zaziyigolide elicwengekileyo; isiliva lalingento etheni emihleni kaSolomoni. ₂₁Inkosi uSolomoni yathumela imikhumbi yayo eTharishishi kanye nezinceku zikaHuramu. Kwakuthi kanye emuva kweminyaka emithathu, ifike imikhumbi yaseTharishishi ithwele igolide, isiliva, izimpondo zendlovu, izimfene, namapigogo.

₂₂Inkosi uSolomoni yaba nkulu kunawo onke amakhosi omhlaba ngengcebo nangokuhlakanipha. ₂₃Wonke amakhosi omhlaba ayefuna ukumbona uSolomoni ubuso nobuso, ukuzwa ngokuhlakanipha kwakhe, uNkulunkulu ayekubeke enhliziyweni kaSolomoni. ₂₄Yileyo naleyo yayimlethela isipho: izitsha zesiliva, izitsha zegolide, izingubo, izikhali, amakha, amahhashi neminyuzi, ekwenza lokhu iminyaka ngeminyaka.

₂₅USolomoni wayenamabhanqa ayizi-4 000 amahhashi nezinqola, abamahhashi abayizi-12 000, wababeka emizini yezinqola nasenkosini eJerusalema. ₂₆Wabusa phezu kwawo wonke amakhosi, kusukela emfuleni kuze kube sezweni lamaFilisti nasemngceleni waseGibhithe. ₂₇Inkosi yenza ukuba isiliva lixhaphake njengamatshe eJerusalema, nemisedari yayenza yaba miningi njengemithombe ehlanzeni. ₂₈USolomoni bamlethela amahhashi evela eGibhithe nasemazweni onke.

₂₉Ezinye izindaba zikaSolomoni, ezakuqala nezakamuva, azilotshiwe yini ezindabeni zikaNathani umphrofethi, nasesiphrofethweni sika-Ahaya waseShilo, nasemibonweni ka-Ido umboni ngoJerobhowamu indodana kaNebhathi na? ₃₀USolomoni wabusa eJerusalema phezu kuka-Israyeli wonke iminyaka engama-40. ₃₁USolomoni wayesekhothama, bamngcwaba kokhokho bakhe, emzini kaDavide uyise. URehobhowamu, indodana yakhe, waba yinkosi esikhundleni sakhe.