AMahubo 85

₁Simakade, ulibusisile izwe lakho,

wamenzela inhlalakahle futhi uJakobe.

₂Walisusa icala labantu bakho,

wazisibekela zonke izono zabo. Sela

₃Uyihoxisile yonke intukuthelo yakho,

waphenduka ekuvutheni kolaka lwakho.

₄Sibuyise, Nkulunkulu wensindiso yethu,

uyeke ukusicasukela.

₅Uzohlala usithukuthelele yini na?

Ulaka lwakho ulwedlulisele

phezu kwezizukulwane ngezizukulwane na?

₆Awuzukusivusa yini, sibuye siphile,

ukuze abantu bakho bathokoze ngawe na?

₇Sikhombise ububele bakho, Simakade,

usiphe insindiso yakho.

₈Ngizokuzwa lokho uNkulunkulu uSimakade azokusho,

uzosho ukuthula kubantu bakhe,

nakulabo abamesabayo.

Mabangabuyeli ebuwuleni!

₉Impela insindiso yakhe iseduzane nabamesabayo,

ukuze inkazimulo yakhe

ihlale ezweni lakithi.

₁₀Kuyakuhlangabezana umusa neqiniso,

kwangane ukulunga nokuthula.

₁₁Iqiniso liyovumbuka emhlabeni,

ukulunga kubheke phansi kusezulwini.

₁₂USimakade uyoveza okuhle,

nezwe lethu liyothela izithelo zalo.

₁₃Ukulunga kuyohamba phambi kwakhe,

kuhlelembele izinyawo zakhe indlela.