AMahubo 77

₁Ngikhala kuNkulunkulu ngezwi eliphakemeyo,

ngiyamemeza ukuze angizwe uNkulunkulu.

₂Ngosuku losizi lwami, ngifuna iNkosi,

ebusuku ngelule isandla sami ngingakhathali.

Umphefumulo wami uyenqaba ukududuzwa.

₃Ngikhumbula uNkulunkulu, ngibubule;

ngiyazindla, umoya wami udangele. Sela

₄Uzibambile izinkophe zami,

amehlo ami awavaleki.

Ngikhathazekile, akusakhulumeki.

₅Ngininga ngezinsuku zasemandulo,

ngikhumbula iminyaka yakudala.

₆Ebusuku ngiyakhumbula ukubetha kwami ugubhu,

ngizindla enhliziyweni yami,

nomoya wami uyahlolisisa.

₇“Ngabe iNkosi iyokuyekelela

kuze kube phakade na?

Ayiyukuphinda yini ikwenzele umusa?

₈Ngabe ububele bayo

sebuphele ingunaphakade na?

Ngabe isithembiso seminyaka sesiphelile yini

ezizukulwaneni ngezizukulwane na?

₉Ngabe uNkulunkulu usekulibele

yini ukuba nozwelo?

Ngabe ulaka lwakhe

selugabhe uzwelo analo na?”

₁₀Ngase ngithi:

“Kungukuhlupheka kimi

ukuthi isandla soPhezukonke sesiguqukile.”

₁₁Ngiyakuzikhumbula izenzo zikaSimakade,

yebo, ngizikhumbule izimangaliso zasendulo,

₁₂ngicabange ngawo wonke umsebenzi wakho,

ngizindle ngezenzo zakho.

₁₃Indlela yakho, Nkulunkulu, ingcwele.

Yimuphi unkulunkulu omkhulu

njengoNkulunkulu wethu na?

₁₄Wena unguNkulunkulu owenza izimangaliso,

amandla akho uwazisile ezizweni.

₁₅Ngengalo yamandla wabasindisa abantu bakho,

amadodana kaJakobe noJosefa. Sela

₁₆Amanzi akubona, Nkulunkulu,

amanzi akubona, athuthumela,

nezintwa zazamazama.

₁₇Laduma izulu,

amafu adedela imvula,

imicibisholo yakho yathi chithi saka.

₁₈Izwi lokuduma kwakho lisesiphephweni,

imibani yakhanyisa izwe,

umhlaba wandindizela, wazamazama.

₁₉Indlela yakho yayisolwandle,

imendo yakho isemanzini amaningi,

kodwa amanyathelo akho awabonakalanga.

₂₀Abantu bakho wabahola njengezimvu

ngesandla sikaMose no-Aroni.