AMahubo 48

₁Mkhulu uSimakade,

makadunyiswe emzini kaNkulunkulu wethu,

entabeni yakhe engcwele.

₂Inhle ngokuphakama,

ingukuthokoza komhlaba wonke,

intaba iZiyoni isemaphethelweni enyakatho,

umuzi weNkosi enkulu.

₃UNkulunkulu uyaziwa ezigodlweni ukuthi uyinqaba.

₄Ngokuba amakhosi abuthana,

aqhubeka kanyekanye.

₅Ayibona intaba iZiyoni, amangala,

ashaywa wuvalo, aphaphatheka,

₆akhungathwa yingebhe lapho nemihelo,

njengokowesifazane otetayo.

₇Ngomoya wasempumalanga,

waphula imikhumbi yaseTharishishi.

₈Njengalokhu sizwile,

kanjalo sikubonile emzini kaSimakade Wamabandla,

emzini kaNkulunkulu wethu,

uNkulunkulu uyowumisa kuze kube phakade. Sela

₉Sizindla ngomusa wakho, Simakade,

siphakathi ethempelini lakho.

₁₀Njengoba linjalo igama lakho, Nkulunkulu,

zinjalo nezibongo zakho

kuze kube semikhawulweni yomhlaba,

isandla sakho sokunene sigcwele ukulunga.

₁₁Intaba iZiyoni mayithokoze,

kwethabe amadodakazi akwaJuda,

ngenxa yezehlulelo zakho.

₁₂Hambani nizungeze iZiyoni,

nihambe kuyo yonke indawo,

nibale imibhoshongo yalo.

₁₃Qaphelani izindonga zalo,

nidabule ezigodlweni zalo,

ukuze nilandise ngalo

isizukulwane esisazozalwa,

₁₄ukuthi impela lo Nkulunkulu,

unguNkulunkulu wethu waphakade naphakade.

Uzosihola kuze kube sekufeni.