AMahubo 37

₁Ungakhathazeki ngababi,

ungabi namona ngabenza okungalungile,

₂ngokuba bazosishulwa masinyane njengotshani,

babune njengemifino.

₃Thembela kuSimakade,

wenze okuhle,

ukuze uhlale ezweni,

uzondle ngokukholeka;

₄zithokozise ngoSimakade,

khona ezokunika okufiswa yinhliziyo yakho.

₅Nikela indlela yakho kuSimakade; umethembe,

Yena uzokwenzela okufisayo.

₆Ukulunga kwakho kukhanye njengelanga;

nobulungiswa njengemini.

₇Thula phambi kukaSimakade,

umlindele ngesineke;

ungakhathazeki ngonempumelelo endleleni yakhe,

ngomuntu oceba amacebo amabi.

₈Deda entukuthelweni,

uyeke ulaka,

ungakhathazeki,

lokho kuholela ebubini nje.

₉Ngokuba ababi bayobhujiswa,

kodwa labo abalindela uSimakade ngesineke,

bayodla ifa lomhlaba.

₁₀Kusazothatha isikhashana

engabe esababikho omubi,

uyothi lapho uhlola

indawo abe kuyo, ungamfumani.

₁₁Kepha abathobekileyo bazokudla ifa lezwe,

bathokozele ukuthula okukhulu.

₁₂Omubi umsongela okubi olungileyo,

amququdele amazinyo.

₁₃INkosi imhleka usulu,

ngokuba iyabona

ukuthi usuku lwakhe selusondele.

₁₄Ababi bahosha inkemba,

bansale iminsalo yabo

ukuze baqumbe phansi

abampofu nabantulayo,

babulale ohamba ngokulunga.

₁₅Izinkemba zabo zizodla bona,

neminsalo yabo iphoqozwe.

₁₆Kungcono okuncane anakho umuntu olungileyo,

kunengcebo yababi abaningi.

₁₇Izingalo zababi zizophoqozwa,

kodwa uSimakade uyabasimamisa abalungileyo.

₁₈USimakade uyazazi izinsuku zabamsulwa,

ifa labo liyokuma kuze kube phakade.

₁₉Abayukujabha ngesikhathi esibi;

bayoba nenala ngezinsuku zendlala.

₂₀Ababi bayobhubha,

izitha zikaSimakade zishabalale njengobuhle bamadlelo.

Ziyonyamalala njengentuthu, zishabalale.

₂₁Omubi uyoboleka angakubuyiseli,

kodwa olungileyo unesisa, uyaphana.

₂₂Ababusisileyo bazodla ifa lomhlaba;

abaqalekisileyo babhubhe.

₂₃USimakade uyaziqinisa izinyathelo zomuntu

lapho eyithanda indlela yakhe.

₂₄Uma ewa, akayukufumbeka phansi,

ngokuba uSimakade ubamba isandla sakhe.

₂₅Kade ngimusha,

manje sengimdala,

kodwa angikaze ngimbone olungileyo eshiyiwe,

nozalo lwakhe luyizinxibi.

₂₆Uphana, atshelekise ekhululekile,

nozalo lwakhe luyisibusiso.

₂₇Deda kokubi, wenze okuhle,

uyakuhlala kuze kube phakade.

₂₈Ngokuba uSimakade uyabuthanda ubulungiswa,

abathembekileyo bakhe akabashiyi.

Ubalondoloza kuze kube phakade,

kodwa abozalo lwababi bazobhujiswa.

₂₉Abalungileyo bazokudla ifa lomhlaba,

bahlale kuwo ingunaphakade.

₃₀Umlomo wolungileyo ushumayela ukuhlakanipha,

ulimi lwakhe lukhuluma ubulungiswa.

₃₁Umthetho kaNkulunkulu wakhe usenhliziyweni yakhe,

izinyathelo zakhe aziyukushelela.

₃₂Omubi uqamekela olungileyo,

ufuna ukumbulala.

₃₃USimakade akayukumnikela esandleni sakhe,

akuyukumlahla ngecala lapho ehlulelwa.

₃₄Lindela uSimakade, ugcine indlela yakhe,

Yena uzokuphakamisa udle ifa lomhlaba,

uyobona lapho sebebhujiswa ababi.

₃₅Ngimbonile omubi oyisidlova,

enabise okomsedari eLebhanoni ogxilileyo.

₃₆Kwathi lapho ngedlula ngalapho,

wayengasabonwa nangalukhalo,

ngamfuna, kodwa angabe ngisamfumana.

₃₇Mqaphele ongenasici,

umbheke oqotho,

ngokuba uyobona izizukulwane onokuthula.

₃₈Kepha abaphambukayo bayobhujiswa, baphele nya,

nekusasa lababi lishabalale.

₃₉Insindiso yabalungileyo ivela kuSimakade,

uyinqaba yabo ngesikhathi senhlupheko.

₄₀USimakade uyobasiza, abakhulule;

ubakhulula kwababi, abasindise,

ngokuba bayamethemba.