AMahubo 34

₁USimakade ngimbonga ngezikhathi zonke;

izibongo zakhe zizohlala

zisemlonyeni wami njalo njalo.

₂Umphefumulo wami uyozincoma ngoSimakade,

abathobekileyo mabezwe, bajabule.

₃Mbongeni kanye nami uSimakade,

siliphakamise kanyekanye igama lakhe.

₄Ngamfuna uSimakade, wangiphendula;

wangikhulula kulo lonke uvalo lwami.

₅Ababheka kuye, baba nokukhanya.

Ubuso babo abusoze bajabha.

₆Nasi isihlupheki esakhala uSimakade wasilalela,

wasisindisa kuzo zonke izinhlupheko esasikuzo.

₇Ingelosi kaSimakade ikanisa nxazonke

kulabo abamesabayo, ibakhulule.

₈Yizwani, nibone

ukuthi uSimakade muhle;

babusisiwe labo abaphephela kuye.

₉Mesabeni uSimakade

nina bangcwele bakhe,

ngokuba abamesabayo abasweli lutho.

₁₀Amabhongo amabhubesi ayeswela, alambe,

kodwa abafuna uSimakade

abayukweswela lutho oluhle.

₁₁Wozani bantwana, lalelani kimi,

ngizonifundisa ukwesaba uSimakade.

₁₂Ngubani ofisa ukuphila,

othanda izinsuku eziningi

zokuthokozela okuhle na?

₁₃Londa ulimi lwakho kokubi,

nezindebe zakho ekukhulumeni inkohliso.

₁₄Gwema okubi, wenze okuhle;

funa ukuthula, ukuphokophelele.

₁₅Amehlo kaSimakade aqaphela abalungileyo,

izindlebe zakhe zivulekele ukukhala kwabo.

₁₆Ubuso bukaSimakade bumelene nabenzi bokubi,

ukuba aqede ukukhunjulwa kwabo emhlabeni.

₁₇USimakade uyakuzwa ukunxusa kwabalungileyo,

abakhulule kuzo zonke izinhlupheko zabo.

₁₈USimakade useduze nabanhliziyo zidabukile,

uyabasindisa abanomoya owaphukileyo.

₁₉Ziningi izinhlupheko zolungileyo,

kepha uSimakade uyamkhulula kuzo zonke.

₂₀Uvikela wonke amathambo akhe,

akuyukwaphulwa nalinye kuwo.

₂₁Inkohlakalo iyombulala omubi,

abazonda olungileyo bayojeza.

₂₂USimakade uyakukhulula ukuphila kwezinceku zakhe,

akekho ophephela kuye oyojeza.