AMahubo 31

₁Simakade, ngiphephela kuwe,

mangingajabhiswa naphakade,

ngikhulule ngokulunga kwakho.

₂Indlebe yakho ibeke kimi,

ungikhulule ngokushesha.

Yiba yidwala

lokuphephela kimi,

inqaba eqinileyo

engikhosela kuyo.

₃Impela Wena uyidwala

lami nenqaba yami;

ngenxa yegama lakho

uyangihola,

ungiqondise.

₄Ngikhiphe ogibeni

abangicuphe ngalo,

ngokuba Wena

uyisiphephelo sami.

₅Umoya wami ngiwubeka

esandleni sakho,

ungikhululile, Simakade,

Nkulunkulu weqiniso.

₆Ngiyabazonda labo

abakhonza onkulunkulu abayize,

kodwa mina

ngethembele kuSimakade.

₇Ngizokwethaba

ngijabule ngomusa wakho,

ngokuba ukubonile

ukuhlupheka kwami,

wazinaka izinsizi

zomphefumulo wami;

₈awunginikelanga

esandleni sesitha,

wazimisa izinyawo zami

endaweni ebanzi.

₉Yiba nomusa kimi, Simakade,

ngokuba ngisenkathazweni,

iso lami liyafiphala

ngenxa yosizi,

nomphefumulo

nomzimba wami.

₁₀Ngokuba ukuphila kwami

kuphelela osizini,

neminyaka yami ekububuleni;

amandla ami aphelile

ngokona kwami,

namathambo ami ancunzekile.

₁₁Ngiyisigcono sazo

zonke izitha zami,

ingasaphathwa-ke

eyomakhelwane bami.

Sengiyinto esabisayo

kubangani bami.

Engihlangana nabo emgwaqweni

bayangibalekela.

₁₂Sebengikhohliwe

ezinhliziyweni zabo,

senginjengomuntu ofileyo,

nesitsha esephukileyo.

₁₃Ngokuba ngikuzwile

ukuhleba kwabaningi,

nokwesabisa nxazonke.

Baceba amacebo

okumelana nami;

bahlongoza ukungibulala.

₁₄Kepha mina

ngethemba Wena Simakade,

ngithi:

“Wena unguNkulunkulu wami.”

₁₅Izikhathi zami

zisesandleni sakho,

ngikhulule esandleni

sezitha zami

nakulabo abangizingelayo.

₁₆Khanyisa ubuso bakho

phezu kwenceku yakho,

ngomusa wakho ungisindise.

₁₇Simakade mangingajabhiswa,

ngokuba ngikhala kuwe,

izikhohlakali mazijabhiswe,

ziyiswe kwelabafileyo

sezithule.

₁₈Mazithuliswe izindebe zamanga

ezijivaza olungileyo

ngokuzidla nangokweyisa.

₁₉Yeka ubukhulu

bomusa wakho,

owulondele labo abakwesabayo,

owenzele labo

ababalekela kuwe

phambi kwabantu.

₂₀Ubafihla emphemeni

wobukhona bakho,

ezigungwini zababakhela uzungu.

Ubagcina bephephile

edokodweni lakho,

olimini olumbaxambili.

₂₁Makabongwe uSimakade,

ngokuba ungenzele

umusa wakhe omangalisayo

ngesikhathi ngisemzini

ovinjezelweyo.

₂₂Ngenxa yovalo mina ngithe:

“Ngixoshiwe phambi

kwamehlo akho.”

Kepha ukuzwile ukunxusa kwami

ngesikhathi ngikhala kuwe.

₂₃Mthandeni uSimakade

nina nonke abamethembayo.

USimakade uyabalondoloza

abathembekileyo,

aziphindiselele kulowo ozidlayo.

₂₄Qinani, inhliziyo yenu

ime isibindi,

nina nonke enethembela kuSimakade.