AMahubo 26

₁Ngahlulele, Simakade,

ngokuba ngihamba ngobuqotho,

ngethembele kuwe

angaze ngangabaza.

₂Ngivivinye, Simakade,

ungihlolisise,

hlola izizindlo zenhliziyo yami,

nengqondo yami.

₃Ngokuba isihawu sakho siphambi kwami,

ngihamba ngeqiniso lakho.

₄Angihlali nabantu bamanga,

angihambelani nezimbulu.

₅Ngiyawuzonda umgwamanda

wabenza okubi,

futhi ngeke ngihlale nezikhohlakali.

₆Ngigeza izandla zami ngingenacala,

ukuze ngizungeze i-althare lakho, Simakade,

₇ngimemezele ihubo lokubonga,

ngilandise ngazo zonke

izimangaliso zakho.

₈Simakade, ngiyithanda kakhulu

indlu ohlala kuyo,

nendawo lapho kuhlala

khona inkazimulo yakho.

₉Ungangilahli kanye nezoni,

nomphefumulo wami kanye nabantu

abalambele igazi,

₁₀abazandla zabo zingamathuluzi enkohlakalo,

esokunene sabo sigcwele imifumbathiso.

₁₁Kepha mina ngihamba ngobuqotho;

ngikhulule, ube nomusa kimi.

₁₂Unyawo lwami lumi endaweni ehlelembekile;

ngisebandleni, ngizomdumisa uSimakade.