AMahubo 147

₁Haleluya!

Kumnandi kakhulu ukuhlabelelela uNkulunkulu wethu,

ngokuba unomusa,

indumiso imfanele.

₂USimakade wakha iJerusalema,

uqoqa abakwa-Israyeli ababexoshiwe.

₃Welapha abanhliziyo zephukile,

abophe izilonda zabo.

₄Ubala inani lezinkanyezi,

azibize zonke ngamagama.

₅INkosi yethu inkulu,

makhulu amandla ayo;

ukuqonda kwayo akunakulinganiswa.

₆USimakade uyabaphakamisa abathobekileyo,

izikhohlakali uziqumba phansi.

₇Hubelani uSimakade ngokubonga,

nimdumise uNkulunkulu wethu ngehabhu,

₈osibekela izulu ngamafu,

olungisela umhlaba imvula,

ohlumisa utshani ezintabeni.

₉Unika izinkomo ukudla kwazo,

namazinyane egwababa akhalayo.

₁₀Akathokozi ngamandla ehhashi,

akajatshuliswa yijubane lomuntu.

₁₁USimakade ujatshuliswa ngabamesabayo,

labo abathembela emuseni wakhe.

₁₂Jerusalema, mbabaze uSimakade,

Ziyoni, mdumise uNkulunkulu wakho,

₁₃ngokuba imigoqo yamasango uyiqinisile,

ubabusisile abantwana bakho ngaphakathi kwakho.

₁₄Wenza kube nokuthula emingceleni yakho,

akusuthise ngokolo.

₁₅Uthumela umyalo wakhe emhlabeni,

izwi lakhe ligijima ngesikhulu isivinini.

₁₆Wendlala iqhwa njengoboya,

asakaze isithwathwa njengomlotha.

₁₇Wehlisa isichotho njengezinhlamvu;

ngubani ongema phambi kwamakhaza akhe na?

₁₈Usho ngezwi, kuncibilike;

wenza umoya uphephethe,

amanzi ageleze.

₁₉Uzwakalisa izwi lakhe kuJakobe,

izimiso zakhe nezehlulelo zakhe, ku-Israyeli.

₂₀Asikho isizwe ake wenza kanjalo kuso,

azizazi izehlulelo zakhe.

Haleluya!