AMahubo 144

₁Makabongwe uSimakade, idwala lami,

ofundisa izandla zami ukuhlasela,

neminwe yami, ukulwa,

₂umusa wami nenqaba yami,

umbhoshongo wami ophakemeyo

nomkhululi wami,

isihlangu sami, nengiphephela kuye,

nothobisa izizwe phansi kwami.

₃Simakade, uyini umuntu ukuba umazi,

nendodana yomuntu ukuba uyikhumbule na?

₄Umuntu ufana nomoya;

izinsuku zakhe zinjengethunzi elidlulayo.

₅Thobisa amazulu akho, Simakade, wehle,

thinta izintaba, zithunqe.

₆Imibani mayinyazime, ubahlakaze,

thumela imicibisholo yakho, ubaphithizise.

₇Yelulela isandla sakho phezulu,

ungikhulule, ungihlenge emanzini amaningi,

nasesandleni sabafokazi

₈abamlomo wabo ukhuluma inkohliso,

nesandla sabo sokunene singesokunene samanga.

₉Ngiyakuhlabelela kuwe Nkulunkulu isihlabelelo esisha,

ngogubhu olunezintambo ezilishumi, ngiyakukuhubela.

₁₀Nguye opha amakhosi insindiso,

osindisa inceku yakhe, uDavide,

enkembeni yababi.

₁₁Ngikhulule, ungihlenge esandleni sabafokazi

abamlomo wabo ukhuluma inkohliso,

nesandla sabo sokunene singesokunene samanga.

₁₂Makuthi amadodana ethu, ebusheni bawo,

afane nezithombo ezikhule kahle,

amadodakazi ethu afane nezinsika zamakhona

eziqoshelwe ukwakha isigodlo.

₁₃Kwangathi izinqolobane zethu

zingaphuphuma isivuno esehlukahlukene,

izimvu zethu zande ngezinkulungwane,

izinkulungwane ezilishumi emadlelweni akithi.

₁₄Sengathi izinkomo zethu

zingaba namathole amaningi.

Makungabi bikho kufohla ogangeni,

kungathunjwa muntu,

futhi kungabi bikho ukukhala

emigwaqweni yakithi.

₁₅Babusisiwe abantu abayokwehlelwa yizibusiso ezinjalo,

babusisiwe abantu abaNkulunkulu wabo unguSimakade.