AMahubo 135

₁Haleluya!

Dumisani igama likaSimakade;

mdumiseni nina zinceku zikaSimakade,

₂enikhonza endlini yakhe,

emagcekeni endlu kaNkulunkulu wethu.

₃Mdumiseni uSimakade,

ngokuba Yena muhle,

lihubeleni igama lakhe,

ngokuba lihle.

₄Ngokuba uSimakade uziqokele uJakobe no-Israyeli,

ukuba abe yifa lakhe.

₅Impela ngiyazi ukuthi uSimakade mkhulu,

nokuthi iNkosi yethu ingaphezu

konkulunkulu bonke.

₆Noma yini uSimakade ayithandayo uyayenza,

ezulwini nasemhlabeni,

emanzini nasezinzulwini zonke.

₇Ukhuphula izinkungu emikhawulweni yomhlaba,

enze imibani ibe yimvula,

akhiphe umoya ezinqabeni zakhe.

₈Washaya amazibulo aseGibhithe,

awabantu nawezilwane.

₉Wathumela izibonakaliso nezimangaliso

phakathi kwakho, Gibhithe,

phezu kukaFaro nezinceku zakhe zonke.

₁₀Washaya izizwe ezinkulu,

wabulala amakhosi anamandla:

₁₁uSihoni, inkosi yama-Amori,

u-Ogi, inkosi yaseBhashani,

nemibuso yonke eKhanani.

₁₂Wathatha izwe labo laba yifa,

laba yifa lika-Israyeli,

isizwe sakhe.

₁₃Simakade, igama lakho limi ingunaphakade.

Simakade, ukhunjulwa yizizukulwane ngezizukulwane.

₁₄Ngokuba uSimakade uyokwehlulela abantu bakhe,

azihawukele izinceku zakhe.

₁₅Izithombe zabezizwe ziyisiliva negolide,

umsebenzi wezandla zomuntu.

₁₆Umlomo zinawo, kepha azikhulumi,

amehlo zinawo, kodwa aziboni.

₁₇Izindlebe zinazo, kepha azizwa,

nomoya awukho emlonyeni wazo.

₁₈Abazenzayo bayafana nazo,

bonke abazithembayo.

₁₉Wena ndlu ka-Israyeli, mbonge uSimakade,

wena ndlu ka-Aroni, mbonge uSimakade.

₂₀Wena ndlu kaLevi, mbonge uSimakade,

nina enimesabayo uSimakade,

mbongeni uSimakade.

₂₁USimakade makabongwe eZiyoni,

yena owakhe eJerusalema.

Haleluya!