AMahubo 129

₁Bangihluphe kakhulu,

kusukela ebusheni bami,

makasho njalo u-Israyeli.

₂Bangihlupha kakhulu,

kodwa abangehlulanga.

₃Kwaphambana imivimbo emhlane wami,

kwangathi yimisele edatshulwe ngabalimi ensimini.

₄USimakade ulungile,

uzinqumile izintambo zezikhohlakali.

₅Mabajabhiswe,

babuyiselwe emuva

bonke abazonda iZiyoni.

₆Mabafane notshani ophahleni,

obubuna bungakakhuli.

₇Ovunayo akagcwalisi ngabo isandla sakhe,

nobopha izinyanda, izingalo zakhe.

₈Abadlulayo mabathi:

“Isibusiso sikaSimakade masibe phezu kwenu;

siyanibusisa egameni likaSimakade.”