AMahubo 115

₁Ayingabi kithina Simakade,

ayingabi kithina,

kodwa yinike igama lakho inkazimulo,

ngenxa yomusa wakho neqiniso lakho.

₂Kungani abezizwe bethi:

“Uphi manje uNkulunkulu wabo na?”

₃UNkulunkulu wethu usezulwini,

wenza konke ngokuthanda kwakhe.

₄Izithombe zabo ziyisiliva negolide,

umsebenzi wezandla zomuntu.

₅Umlomo zinawo, kepha azikhulumi,

amehlo zinawo, kepha aziboni.

₆Izindlebe zinazo, kepha azizwa,

zinamakhala, kepha azihogeli.

₇Zinezandla, kepha aziphathi,

zinezinyawo, kepha azihambi,

azenzi msindo ngemiphimbo yazo.

₈Abazenzayo bayafana nazo,

bonke abazethembayo.

₉Israyeli, themba kuSimakade,

Yena ulusizo lwabo nesihlangu sabo.

₁₀Wena ndlu ka-Aroni, themba kuSimakade,

Yena ulusizo lwabo nesihlangu sabo.

₁₁Nina enesaba uSimakade thembelani kuSimakade,

Yena ulusizo lwabo nesihlangu sabo.

₁₂USimakade usikhumbulile, uzosibusisa,

abusise indlu ka-Israyeli,

abusise indlu ka-Aroni.

₁₃USimakade uzobabusisa abamesabayo,

abancane nabadala.

₁₄USimakade makanandise, nina nabantwana benu.

₁₅Manibe ngababusisiweyo bakaSimakade,

uMdali wezulu nomhlaba.

₁₆Izulu lingelikaSimakade,

kepha umhlaba wawabela abantwana babantu.

₁₇Abafileyo abamdumisi uSimakade,

namunye wabo asebehlele endaweni yabafileyo.

₁₈Kepha thina sizombonga uSimakade

kusukela manje kuze kube phakade,

Haleluya!