IZaga 9

₁Ukuhlakanipha sekwakhe indlu yakho;

kuzibazile izinsika zakho eziyisikhombisa.

₂Kuhlabe umhlatshelo,

kwavubela iwayini lakho,

kwadeka netafula lakho.

₃Kuthume izintombi zakho,

kuyamemeza emagqumeni

aphakemeyo omuzi, kuthi:

₄“Ongenalwazi makaphambukele lapha;”

nakulowo ongenangqondo, kuthi kuye:

₅“Wozani nidle isinkwa sami,

niphuze iwayini engilivubeleyo.

₆Shiyani izinto zobuwula, niphile,

nihambe ngendlela yokuqonda.

₇“Osola isedeleli uzibangela ukwethukwa,

nothethisa isikhohlakali uziholela ukulimala.

₈Ungasithethisi isedeleli, funa sikuzonde;

sola ohlakaniphileyo, uyakukuthanda.

₉Yala ohlakaniphileyo, uzohlakanipha kakhulu;

ufundise olungileyo, uzothuthuka ngokuqonda.

₁₀“Ukuqala kokuhlakanipha kungukumesaba uSimakade,

nokumazi oNgcwele kungukuqonda.

₁₁Izinsuku zakho ziyokwanda ngami,

kwenezelwe neminyaka yokuphila kwakho.

₁₂Uma uhlakaniphile, uzihlakaniphele;

uma wedelela, uyakukuthwala wena wedwa.”

₁₃Owesifazane oyisiwula unomsindo,

uyisiwula, akazi lutho.

₁₄Uhlala ngasemnyango wendlu yakhe,

esihlalweni esisendaweni ephakemeyo yomuzi,

₁₅ukuze ameme

abedlula ngendlela,

abaqondile emikhondweni yabo, athi:

₁₆“Ongenalwazi makaphambukele ngapha;”

kulowo ongenangqondo, uthi kuye:

₁₇“Amanzi okwebiwa amnandi,

nesinkwa esidlelwa esithe siyenamisa.”

₁₈Kepha ophambukayo akazi ukuthi kukhona

izithunzi lapho,

nokuthi izimenywa zakhe

zisendleleni eya kwelabafileyo.