IZaga 8

₁Ukuhlakanipha akumemezi yini,

nokuqonda akuvezi yini ilaka lakho na?

₂Kumi ezindaweni eziphakemeyo ngasendleleni,

kwakhile ngaseziphambanweni zezindlela,

₃ngasekungeneni, emasangweni omuzi kuyamemeza, kuthi:

₄“Ngiyanibiza nina bantu;

izwi lami liqondiswe kubantwana babantu.

₅Nina eningenalwazi qondani ukuhlakanipha;

nani ziwula, yibani nenhliziyo eqondayo.

₆Lalelani izinto ezinkulu engizikhulumayo;

amazwi aphuma ezindebeni

zomlomo wami angubuqotho,

₇ngokuba umlomo wami uzakukhuluma iqiniso;

ububi buyisinengiso ezindebeni zami.

₈Wonke amazwi avela emlonyeni

wami angukulunga;

akukho lutho kuwo

okuyisigwegwe nokuphambeneyo.

₉Kumuntu oqondayo wonke aqondile,

alungile kulowo othole ulwazi.

₁₀Yamukelani ukuyala kwami kunesiliva,

nolwazi, kunegolide lekhethelo,

₁₁ngokuba ukuhlakanipha kuhle kunobucwebecwebe,

akukho lutho olunye olufiswayo

olungaqhathaniswa nakho.

₁₂Mina kuhlakanipha ngihlala ekuqondeni,

ngithola ulwazi namasu.

₁₃Ukwesaba uSimakade kungukuzonda okubi.

Ukuzikhukhumeza, ukuzidla,

indlela embi, nomlomo ophoxayo,

ngiyakuzonda.

₁₄Kimina kuneseluleko nokuhlakanipha,

ngingukuqonda, namandla angawami.

₁₅Amakhosi abusa ngami,

nababusi bashaya imithetho elungile ngami.

₁₆Izikhulu zibusa ngami, namakhosana,

nabo bonke abehluleli bomhlaba.

₁₇Ngiyabathanda abangithandayo;

nalabo abangifunisisayo, bayangifumana.

₁₈Ingcebo, udumo, nomnotho omningi

nokulunga, kukimi.

₁₉Isithelo sami sihle kunegolide,

kunegolide elicolisekileyo,

nenzuzo yami, kunesiliva lekhethelo.

₂₀Ngihamba endleleni yokulunga,

emikhondweni yobulungiswa,

₂₁labo abangithandayo ngibanika ifa,

ngigcwalise izinqolobane zabo zengcebo.

₂₂“USimakade wangidala kuqala

kunayo yonke imisebenzi yakhe;

ngingowokuqala emisebenzini yakhe.

₂₃Wangimisa kwasemandulo, ekuqaleni,

ngaphambi kokusekelwa komhlaba.

₂₄Zingakabi bikho izinzulu

nemithombo egcwele amanzi, ngazalwa.

₂₅Zingakasekelwa izintaba

nangaphambi kokuba amagquma abe khona, ngazalwa,

₂₆ngaphambi kokuba enze umhlaba namasimu,

nohlamvu lokuqala lothuli lomhlaba.

₂₇Ngesikhathi ehlela amazulu ngangikhona;

nalapho edweba isiyingi ezinzulwini otweni.

₂₈Lapho enza isibhakabhaka phezulu siqine,

nangesikhathi imithombo yezinzulu iphuphuma ngamandla;

₂₉lapho emisela ulwandle umkhawulo,

ukuze amanzi angeqi umyalo wakhe;

lapho emisa izisekelo zomhlaba,

₃₀ngangiseduze kwakhe,

ngiyingcweti yomsebenzi,

ngiyintokozo yakhe imihla ngemihla,

ngiyintokozo yakhe,

ngidlala phambi kwakhe sonke isikhathi.

₃₁Ngajabula kuyo yonke indawo

emhlabeni wakhe,

intokozo yami yayikanye nabantwana babantu.

₃₂“Ngakho-ke bantwana, ngizweni,

ngokuba babusisiwe abagcina izindlela zami.

₃₃Lalelani ukuyalwa,

nenze ngokuhlakanipha;

ningakushayi indiva.

₃₄Ubusisiwe umuntu ongilalelayo,

alinde imihla ngemihla emasangweni ami,

ahlale ngasezinsikeni zeminyango yami.

₃₅Ngokuba ongifunayo, ufumana ukuphila,

azuze umusa kuSimakade.

₃₆Kodwa lowo owehluleka ukungifumana,

uzigwaza ngowakhe;

bonke abangizondayo bathanda ukufa.”