IZaga 6

₁Ndodana yami,

uma ube yisibambiso somakhelwane wakho,

naze naxhawulana nomfokazi;

₂usubanjwe ngamazwi akho,

wabhajwa ngenxa yalokho okushilo.

₃Ngakho-ke yenza lokhu, ndodana yami,

ukuze uzikhulule,

ngokuba usuphila phansi

kwesandla sikamakhelwane wakho:

khothama phambi kwakhe, umncengisise.

₄Amehlo akho ancishe ubuthongo,

nezinkophe zakho, ukozela.

₅Zisindise njengensephe esandleni somzingeli,

nanjengenyoni esandleni somcuphi.

₆Yana entuthwaneni, vilandini,

ubone izindlela zayo, uhlakaniphe;

₇yona ethi ingenamholi,

nambonisi, nambusi,

₈nokho ilungise ehlobo isinkwa sayo,

ibuthe ukudla kwayo ngesikhathi sokuvuna.

₉Uyakulala kuze kube nini, vilandini?

Uyakuvuka nini ebuthongweni bakho na?

₁₀Ngobuthongo nje obuncane,

nokozela nje okuncane,

ukusonga izandla kancane kuze kulalwe;

₁₁ubuphofu buyokwehlela njengomhambuma,

ukuntula kukuhlasele njengendoda ehlomileyo.

₁₂Umuntu ongenamsebenzi walutho, umuntu wokona,

uhamba ephafuza inkohliso;

₁₃ucifa iso,

ashuduze ngezinyawo,

aqhwebe ngeminwe;

₁₄njalo uceba okubi nenkohliso

enhliziyweni yakhe,

futhi uphehla udweshu.

₁₅Ngakho-ke uyokwehlelwa yinhlekelele engazelele;

ngokuphazima kweso, uyobhubha angasindi.

₁₆Kukhona izinto eziyisithupha azizondayo uSimakade,

yebo, eziyisikhombisa eziyisinengiso esikhulu

emphefumulweni wakhe:

₁₇Ngamehlo azidlayo,

ulimi lwamanga,

izandla ezichitha igazi elingenacala;

₁₈inhliziyo eceba okubi,

izinyawo ezishesha ukugijimela ebubini;

₁₉ufakazi ofakaza amanga ophafuza inkohliso,

odala ingxabano kubafowabo.

₂₀Ndodana yami,

gcina umyalo kayihlo,

ungawushiyi umthetho kanyoko.

₂₁Yibophele njalo enhliziyweni yakho,

uyithandele entanyeni yakho.

₂₂Mayikuhole ekuhambeni kwakho,

ikulinde lapho ulele,

ikhulume nawe lapho uvuka.

₂₃Ngokuba imiyalo iyisibani,

nomthetho ungukukhanya,

nokusola ngokuyala kuyindlela yokuphila,

₂₄ukuze uvikeleke kowesifazane okhohlakeleyo,

nasekuthopheni kolimi lowesifazane ondindayo.

₂₅Ungabukhanuki ubuhle bakhe enhliziyweni yakho,

angakubambi ngezinkophe zakhe.

₂₆Ngokuba owesifazane oyisiphingi ungamkhokhela

ngeqebelengwane lesinkwa,

kepha umfazi ophingayo womuntu,

uzingela impilo eyigugu yendoda.

₂₇Umuntu angawubeka yini

umlilo esifubeni sakhe,

izingubo zakhe zingashi na?

₂₈Umuntu angahamba yini

phezu kwamalahle avuthayo,

izinyawo zakhe zingashi na?

₂₉Unjalo-ke olala nomfazi kamakhelwane wakhe:

noma yimuphi omthintileyo uyakujeziswa.

₃₀Abamdeleli yini oyisela uma entshontsha

ukuze azisuthise lapho elambile na?

₃₁Uma ebhadanyiwe,

bamhlawulisa ngokuphindwe kasikhombisa,

akhokhe ngayo yonke impahla yomuzi wakhe.

₃₂Ophinga nowesifazane akanakho ukuqonda;

owenza lokho ubhubhisa impilo yakhe.

₃₃Uyakuthola imivimbo nokuphoxeka,

ukwethukwa kwakhe akuyukwesulwa.

₃₄Ngokuba isikhwele sivusa ulaka

endodeni yakhe,

uma isiziphindiselela ngeke ibe nasihawu.

₃₅Ayiyukufuna nhlawulo;

ayiyukukwemukela ukufunjathiswa.