IZaga 28

₁Izikhohlakali zibaleka

noma kungekho ozixoshayo,

kepha abalungileyo banesibindi njengengonyama.

₂Ngenxa yesiphambeko sezwe, linezikhulu eziningi,

kepha ngomuntu onokuqonda nonolwazi liyakuma.

₃Umuntu oswelayo kodwa acindezele abampofu,

unjengemvula ekhukhula ingashiyi kudla.

₄Abalahla umthetho batusa izikhohlakali,

kepha abagcina umthetho balwa nazo.

₅Abantu ababi ababuqondi ubulungiswa,

kodwa abafuna uSimakade, bakuqonda konke.

₆Ungcono ompofu ohamba ngobuqotho,

kunocebileyo ohamba ngezindlela ezigwegwile.

₇Ogcina umthetho uyindodana ehlakaniphileyo,

kanti ongumngani weziminzi uhlazisa uyise.

₈Owandisa ingcebo ngenzalo nangenzuzo

ethe xaxa,

uyiqoqela onomusa kwabampofu.

₉Ofulathelisa indlebe yakhe ekulaleleni umthetho

nomkhuleko wakhe, uyisinengiso.

₁₀Oyengela abaqotho endleleni embi,

nguyena oyokhalakathela emgodini,

kepha abangenasici bayodla ifa elihle.

₁₁Ocebileyo uhlakaniphile emehlweni akhe,

kodwa ompofu onokuqonda

uyamhlolisisa, ambone.

₁₂Lapho abaqotho bethokoza,

kuba nodumo olukhulu,

kodwa uma izikhohlakali ziphakama,

abantu bayacasha.

₁₃Ofihla iziphambeko zakhe akayukuphumelela,

kepha ozivumayo azishiye uyakuthola umusa.

₁₄Ubusisiwe umuntu owesaba njalo,

kepha oyenza lukhuni inhliziyo yakhe

uyakuwela ebubini.

₁₅Umbusi okhohlakele obusa abampofu,

unjengengonyama ebhodlayo

nebhele elihahayo.

₁₆Umbusi ongenakuqonda ungumcindezeli ononya,

kodwa ozonda inzuzo engalungile

uyophila isikhathi eside.

₁₇Umuntu osindwa yigazi lomunye,

uyakubaleka kuze kube segodini;

makangasizwa muntu.

₁₈Ohamba ngobuqotho uzophepha,

kepha ohamba ngezindlela ezigwegwile

uyokuwa kwenye yazo.

₁₉Olima insimu yakhe

uyosuthiswa ngukudla,

kepha olandela amayiyane,

uyosutha ubumpofu.

₂₀Owethembekileyo uyolandelwa yizibusiso,

kepha oceba ngokushesha

akayukuyekwa angajeziswa.

₂₁Ukwenzelela akukuhle,

kepha ngocezwana nje lwesinkwa

umuntu angenza okubi.

₂₂Umuntu onomona uyashesha ukuceba,

kodwa akazi ukuthi ubuphofu buyakufika kuye.

₂₃Osola umuntu uyakuthola ngasemuva isisa

kunothopha ngolimi lwakhe.

₂₄Ophanga uyise nonina, ethi:

“Akusiso isiphambeko,”

yena ungumngani wombhubhisi.

₂₅Umuntu ozazisayo udala ingxabano,

kodwa owethembela kuSimakade uyakucetshiswa.

₂₆Owethembela enhliziyweni yakhe uyisiwula,

kepha ohamba ngokuhlakanipha uyakhululwa.

₂₇Opha ompofu akayukuswela,

kepha ositheza amehlo akhe

uyakuba neziqalekiso eziningi.

₂₈Lapho izikhohlakali zivuka

abantu bayacasha,

kepha ngokubhubha kwazo

abalungileyo bayanda.