IZaga 26

₁Njengeqhwa ehlobo,

nemvula ngesikhathi sokuvuna,

kanjalo udumo alusifanele isiwula.

₂Njengenyoni ekuhambeni kwayo,

nenkonjane ekundizeni kwayo,

sinjalo isiqalekiso esingenasizathu.

₃Isiswebhu singesehhashi,

netomu lingelembongolo,

noswazi lungolomhlane weziwula.

₄Ungasiphenduli isiwula njengobuwula baso,

funa ufane naso.

₅Phendula isiwula njengobuwula baso,

funa sibe ngohlakaniphileyo emehlweni aso.

₆Othumela umbiko ngesiwula uzigwaza ngowakhe;

ufana nozinqume izinyawo.

₇Njengemilenze yokhubazekileyo elengayo,

sinjalo nesaga emilonyeni yeziwula.

₈Onika isiwula udumo

ufana nobophela itshe endwayimaneni.

₉Njengeva elihlaba isandla sesidakwa,

sinjalo nesaga emilonyeni yeziwula.

₁₀Njengomnembi ngomcibisholo olimaza bonke,

unjalo oqasha isiwula esizidlulelayo.

₁₁Njengenja ebuyela ebuhlanzweni bayo,

kanjalo isiwula siphinda ubuwula baso.

₁₂Kunethemba ngesiwula

kunozibona ehlakaniphile emehlweni akhe.

₁₃Ivila lithi:

“Kukhona ingonyama endleleni,

nebhubesi phakathi esigcawini.”

₁₄Isicabha siphenduka ngezingibe zaso,

nevila ecansini lalo.

₁₅Ivila liyasifihla isandla salo esitsheni;

alisibuyiseli emlonyeni walo.

₁₆Ivila lihlakaniphile emehlweni alo,

kunabayisikhombisa abakhuluma okuhluzekile.

₁₇Njengomuntu obamba inja eyedlulayo ngamadlebe,

unjalo ozigaxa engxabanweni yabanye abantu.

₁₈Njengohlanya oluphonsa izikhuni

nemicibisholo ebulalayo,

₁₉unjalo umuntu

okhohlisa umakhelwane wakhe, athi:

“Bengizintelela nje.”

₂₀Ngaphandle kwezikhuni, umlilo uyacima,

kanjalo lapho kungekho khona abahlebayo,

ingxabano iyaphela.

₂₁Njengamalahle othuthwini

nezinkuni emlilweni,

unjalo umuntu ophehla udweshu.

₂₂Amazwi ohlebayo anjengesibiliboco:

ayehlela ezibilini zomuntu.

₂₃Njengesiliva okucakwe ngalo isitsha sobumba,

zinjalo izindebe ezishelelayo

nenhliziyo embi.

₂₄Onenzondo uyazenzisa ngokukhuluma kwakhe,

ebe enenhloso embi enhliziyweni yakhe.

₂₅Lapho ekhuluma ngendlela emnene, ungakholwa,

ngokuba kunezinengiso eziyisikhombisa

enhliziyweni yakhe.

₂₆Noma inzondo yakhe isibekelwa yinkohliso,

ububi bakhe buyodaluleka ebandleni.

₂₇Omba umgodi uyakuphonseka kuwo,

nogingqa itshe liyakubuya ligaye yena.

₂₈Ulimi oluhubhuza amanga luyabazonda olubalimazile;

nomlomo othophayo uyabhubhisa.