IZaga 13

₁Indodana ehlakaniphile iyayalwa nguyise,

kodwa isedeleli asilaleli lapho sikhuzwa.

₂Umuntu uyakudla okuhle

okuvela emazwini akhe amahle,

kepha abambuluzayo balambele ubudlova.

₃Oqaphela akushoyo ulonda impilo yakhe;

uphoshozwayo uyobhubha.

₄Umphefumulo wevila uyafisa ungatholi lutho,

kepha imiphefumulo yabakhutheleyo iyakuneliswa.

₅Olungileyo uyawazonda amazwi angamanga,

kodwa isikhohlakali sidala amahloni nehlazo.

₆Ukulunga kuyamlondoloza ondlela yakhe iqotho,

kodwa inkohlakalo iyasibhubhisa isoni.

₇Kukhona ozishaya inkinsela kodwa engenalutho,

nozishaya ompofu ebe ecebe kakhulu.

₈Inhlawulo yokuphila komuntu yingcebo yakhe,

kepha ompofu akalaleli ekhuzwa.

₉Ukukhanya kwabalungileyo kukhanya bha,

kepha izibani zezikhohlakali ziyacima.

₁₀Ukuziqhenya kudala ingxabano yodwa,

kodwa kulabo abemukela ukwelulekwa

kukhona ukuhlakanipha.

₁₁Ingcebo etholakala kalula iyancipha,

kepha eqongelelwa kancane, kancane, iyanda.

₁₂Ithemba elingakagcwaliseki ligulisa inhliziyo;

isifiso esiphumelele singumuthi wokuphila.

₁₃Owedelela izwi uzehlisela ukubhujiswa,

kepha owesaba imiyalelo uyakuvuzwa.

₁₄Ukufundisa kohlakaniphileyo kungumthombo wokuphila,

ukuze kudedwe ezihibeni zokufa.

₁₅Ukuqonda kahle kuveza umusa,

kepha indlela yabambuluzayo ilukhuni.

₁₆Bonke abahlakaniphileyo basebenza ngokwazi,

kepha isiwula sisabalalisa ubuwula.

₁₇Isithunywa esikhohlakele siwela ebubini,

kepha isigijimi esithembekileyo siletha ukuphila.

₁₈Ubuphofu nehlazo kukulowo owenqaba ukuyalwa,

kepha oqaphela ukusolwa uyatuswa.

₁₉Isifiso esifezekile siyathokozisa emphefumulweni,

kepha ukudeda ebubini

kuyisinengiso kwabayiziwula.

₂₀Ohamba nabahlakaniphileyo uyakuhlakanipha,

kepha ongumngani weziwula uyolimala.

₂₁Ingozi ilandela izoni,

kepha abalungileyo bavuzwa ngokuhle.

₂₂Olungileyo ushiyela abantwana

babantwana bakhe ifa,

kepha ingcebo yesoni ibekelelwa olungileyo.

₂₃Emqathweni wabampofu kukhona ukudla okuningi,

kepha kuyashabalala ngenxa yokungalungi.

₂₄Oyeka uswazi uyayizonda indodana yakhe,

kodwa oyithandayo uyanakekela ukuba ayiyale.

₂₅Olungileyo udla asuthe eneliswe,

kepha isisu sezikhohlakali

seswele esingasuthiswa ngakho.