IZaga 11

₁Isilinganiso esikhohlisayo siyisinengiso kuSimakade,

kepha isisindo esiyiso siyintokozo kuye.

₂Lapho kuvela ukuziqhenya kulandela ihlazo,

kodwa kwabathobekileyo kukhona ukuhlakanipha.

₃Ukwethembeka kwabaqotho kuyabahola,

kepha ubugwegwe babambuluzayo buyababhubhisa.

₄Ingcebo ayisizi ngosuku lolaka,

kodwa ukulunga kuyahlenga ekufeni.

₅Ukulunga komsulwa kuyayiqondisa indlela yakhe,

kodwa isikhohlakali siyowiswa yinkohlakalo yaso.

₆Ukulunga kuyabasindisa abaqotho,

kodwa abanobuqili bayobhajwa ezinkanukweni zabo.

₇Lapho omubi efa

liyashabalala nethemba lakhe,

nethemba lokwenza okubi liyashabalala.

₈Olungileyo uyakhululwa osizini,

kodwa esikhundleni sakhe kungena isikhohlakali.

₉Ukukhuluma komuntu ongenabunkulunkulu

kuyambulala umakhelwane wakhe,

kepha abalungileyo bakhululwa ngolwazi.

₁₀Uma kubahambela kahle abalungileyo

umuzi uyathokoza;

lapho izikhohlakali zibhubha

kuba khona umsindo wentokozo.

₁₁Ngesibusiso sabaqotho umuzi uyaphakanyiswa,

kepha ngomlomo wezikhohlakali ucekelwa phansi.

₁₂Umuntu owedelela umakhelwange wakhe akanakuhlakanipha,

kodwa onengqondo uyazithulela.

₁₃Oyinhlebi uhamba edalula izimfihlo,

kepha othembekile emoyeni uyayisibekela indaba.

₁₄Lapho kungekho zeluleko khona abantu bayawa,

kodwa lapho kunabeluleki abaningi khona

kuba nokuphumelela.

₁₅Oba yisibambiso somfokazi uhlupheka kakhulu,

kodwa ozonda ukwenza kanjalo ulondekile.

₁₆Owesifazane onomusa uzuza udumo,

kodwa izidlova zizuza ingcebo.

₁₇Umuntu onesihawu uwenzela okuhle

umphefumulo wakhe,

kepha ononya uzilimaza yena uqobo.

₁₈Isikhohlakali sizuza ngokukhohlisa,

kepha ohlwanyela ukulunga unomvuzo weqiniso.

₁₉Ogxilile ekulungeni uyakuphila,

kepha olandela okubi kuyakuba ngukufa kuye.

₂₀Abanezinhliziyo eziphambeneyo bayisinengiso kuSimakade,

kodwa abahamba ngezindlela ezimsulwa

bayintokozo kuye.

₂₁Impela omubi akayukuyekwa angajeziswa,

kodwa isizukulwane sabalungileyo siyakuhlengwa.

₂₂Njengendandatho yegolide ekhaleni lengulube,

unjalo owesifazane omuhle ebe engenangqondo.

₂₃Abalungileyo bafisa okuhle kodwa;

ithemba lezikhohlakali wulaka.

₂₄Ophanayo wandelwa yingcebo yakhe,

kodwa oncishanayo uzibangela ubuphofu bodwa.

₂₅Umuntu ophanayo uyakuceba;

ophuzisa abanye amanzi uyakuphuziswa naye.

₂₆Abantu bayamqalekisa oncishana ngokudla,

kepha isibusiso siyakuba

sekhanda lothengisa ngakho.

₂₇Ofuna okuhle ufuna okwamukelekayo,

kepha ofunisisa okubi kuyakumehlela.

₂₈Othembele engcebeni yakhe uyakuwa,

kepha abalungileyo bayakuhluma njengamaqabunga aluhlaza.

₂₉Ohlupha indlu yakhe uyozuza ize,

nesiwula siyakuba yinceku yonenhliziyo ehlakaniphileyo.

₃₀Isithelo solungileyo singumuthi wokuphila, nohlakaniphileyo

uyayizuza imiphefumulo.

₃₁Olungileyo uthola umvuzo emhlabeni;

kangakanani-ke isikhohlakali nesoni?