UNahumi 1

₂USimakade unguNkulunkulu onomhawu, nophindiselayo;

uSimakade uyaphindisela,

uthukuthele uyabila,

ngolaka lwakhe uyaphindisela

kwabamelene naye,

Uzithukuthelela njalo izitha zakhe.

₃USimakade uyaphuza ukuthukuthela,

mkhulu ngamandla,

impela onecala akayukumyeka angamjezisi,

indlela kaSimakade isesivunguvungwini nasesiphephweni,

amafu awuthuli lwezinyawo zakhe.

₄Ukhuza ulwandle, alomise,

nemifula yonke ayishise,

iBhashani neKharimeli kuyabuna,

kuntshwame nezimbali eLebhanoni.

₅Izintaba ziyazamazama phambi kwakhe,

amagquma ancibilike,

umhlaba uyavokomala,

nezwe nabo bonke abahlala kulo.

₆Ngubani ongamelana nentukuthelo yakhe na?

Ngubani ongabekezelela ulaka lwakhe

oluvuthayo na?

Ulaka lwakhe luthululwe njengomlilo,

namadwala ayaqhekezeka phambi kwakhe.

₇USimakade muhle,

uyinqaba ngosuku lwenhlupheko,

uyabazi labo abaphephela kuye.

₈Kepha ngesikhukhula esiqongile

uyakushabalalisa indawo yakhona,

izitha zakhe azixoshele ebumnyameni.

₉Noma ngabe yiluphi uzungu enilwakhela uSimakade

uyakuluqeda nya.

Ukuhlupheka akuyuphinda kabili.

₁₀Lapho bethandela njengameva,

isiphuzo sabo sifana nesezidakwa,

bayakuqothulwa njengenswani eyomileyo.

₁₁Kukhona ovela kuwe

oceba okubi ngoSimakade,

umluleki owonakele.

₁₂Usho kanje uSimakade:

“Noma benamandla, futhi bebaningi,

kodwa bayakuqothulwa bashabalale,

nakuba ngikuhluphile,

kepha ngeke futhi ngisakuhlupha.

₁₃Manje-ke sengizoliphula ijoka elikuwe,

ngigqashule izibopho zakho.”

₁₄Kepha uSimakade uyalezile ngawe

ukuthi akusayukuphinde kutshalwe egameni lakho,

endlini yonkulunkulu bakho

ngiyakunquma isithombe esibaziweyo

nesithombe esibunjiweyo,

ngiyakwenza ithuna lakho,

ngokuba awuyinto yalutho.

₁₅Bheka ezintabeni izinyawo zoletha izindaba ezinhle,

omemezela ukuthula.

Gubha imikhosi yakho Juda,

feza izifungo zakho,

ngokuba omubi akasayukudabula futhi kuwe.

unqunywe ngokupheleleyo.