ILevithikhusi 17

₁USimakade wakhuluma kuMose, wathi: ₂“Khuluma no-Aroni, namadodana akhe, nabo bonke abantu bakwa-Israyeli, uthi kubo: ‘Yilokhu uSimakade ayale ngakho, ethi: ₃yilowo nalowo muntu wendlu yakwa-Israyeli oyohlaba inkunzi noma imvana noma imbuzi enkanjini, noma ayihlabele ngaphandle kwenkambu, ₄engayilethanga emnyango wethende lokuhlangana ukunikela ngayo ibe ngumnikelo kaSimakade ngaphambi kwethabanakeli likaSimakade, lowo muntu uyakubekwa icala legazi, ngokuba uchithile igazi; lowo muntu uyakunqunywa kwabakubo. ₅Ngalokho abantu bakwa-Israyeli bayoletha imihlatshelo yabo abayihlabele endle, bayoyiletha kuSimakade, kumphristi ongasemnyango wethende lokuhlangana bayinikele ibe yiminikelo yokuthula kuSimakade. ₆Umphristi uyofafaza igazi e-althare likaSimakade ngasemnyango wethende lokuhlangana, ashise amanoni, abe yiphunga elimnandi kuSimakade, ₇ukuze bangaphinde banikele imihlatshelo yabo emadimonini abaphinga nawo. Lokhu kuyokuba yisimiso esiphakade kubo, ezizukulwaneni zabo.’

₈“Uyosho nalokhu kubo uthi: ‘Yilowo nalowo muntu wendlu yakwa-Israyeli noma umfokazi ogogobele phakathi kwabo onikela ngomnikelo wokushiswa noma ngomhlatshelo, ₉kodwa angawulethi emnyango wethende lokuhlangana ukuba awunikele kuSimakade, lowo muntu uyakunqunywa kwabakubo.

₁₀“ ‘Yilowo nalowo muntu wendlu yakwa-Israyeli noma umfokazi ogogobele phakathi kwabo odla igazi noma yiliphi, ngiyomelana nalowo muntu odla igazi, ngimnqume kwabakubo. ₁₁Ngokuba ukuphila komzimba kusegazini; ngininike lona ukwenzela imiphefumulo yenu ukubuyisana e-althare, yigazi elenza ukubuyisana. ₁₂Ngalokho, ngathi kubantu bakwa-Israyeli: “Makungabi bikho muntu phakathi kwenu odla igazi; nomfokazi ogogobele phakathi kwenu akayukulidla.”

₁₃“ ‘Yilowo nalowo muntu kwabakwa-Israyeli noma umfokazi ogogobele phakathi kwabo, ozingela abambe isilwane noma inyoni edliwayo, uyochitha igazi layo, alemboze ngothuli. ₁₄Ngokuba impilo yazo zonke izidalwa igazi lazo nomphefumulo wazo kusegazini lazo, ngalokho ngathi kubantu bakwa-Israyeli: “Aniyukulidla igazi lenyama yonke, ngokuba ukuphila kwazo zonke izidalwa kusegazini lazo; lowo olidlayo uyonqunywa.”

₁₅“ ‘Noma ngubani odla ingcuba noma isilwane esidweshulwe yizilo, noma ngabe ungowolibo noma ngumfokazi, uyohlanza izingubo zakhe, ageze ngamanzi, abe ngongcolileyo kuze kuhlwe, bese eyahlambuluka. ₁₆Kepha uma engazihlanzi, engawugezi umzimba wakhe, uyothwala ububi bakhe.’ ”