ILevithikhusi 14

₁USimakade wakhuluma kuMose, wathi: ₂“Lena yindlela yomthetho eyolandelwa kulowo onochoko ngosuku ahlanjululwa ngalo: uyolethwa kumphristi, ₃umphristi uyophumela ngaphandle kwenkambu. Bheka, uyakumhlolisisa khona ukuthi isifo sochoko sesiphelile yini. ₄Umphristi uyoyala ukuba ozohlanjululwa alethelwe izinyoni ezimbili ezihlambulukileyo, nomsedari, indwangu ebomvu nehisopi. ₅Umphristi uyakuyala ukuba ihlatshwe enye yezinyoni phezu kwamanzi esitsheni sebumba. ₆Uyothatha inyoni ephilayo, umsedari, indwangu ebomvu nehisopi, akucwilise nenyoni ephilayo egazini lenyoni ehlatshelwe phezu kwamanzi agelezayo. ₇Uyakulifafaza kasikhombisa kulowo ohlanjululwayo ochokweni, amemezele ukuthi uhlambulukile, bese eyayiyeka inyoni ephilayo, indizele endle.

₈“Ohlanjululwayo uyohlanza izingubo zakhe, aphuce zonke izinwele zakhe, ageze ngamanzi, ahlambuluke. Emveni kwalokho uyakungena enkanjini, kodwa uyohlala ngaphandle kwethende lakhe izinsuku eziyisikhombisa. ₉Ngosuku lwesikhombisa uyakuphuca zonke izinwele ekhanda lakhe, nasesilevini, nasemashiyeni; yebo, uyakuziphuca zonke izinwele zakhe. Uyohlanza izingubo zakhe, ageze umzimba ngamanzi, ahlambuluke.

₁₀“Ngosuku lwesishiyagalombili uyothatha izimvu ezimbili ezingenasici ezingamaduna, nemvu yensikazi engenasici enonyaka, nokuthathu eshumini kwempuphu ecolisekileyo exutshwe namafutha, nengxenye yelitha lamafutha. ₁₁Umphristi ohlambululayo uyobeka umuntu ozohlanjululwa nalezo zinto phambi kukaSimakade ngasemnyango wethende lokuhlangana. ₁₂Umphristi uyothatha imvu yeduna, anikele ngayo ibe ngumnikelo wecala, nengxenye yelogi lamafutha, akuzungezise kube ngumnikelo wokuzungeziswa phambi kukaSimakade. ₁₃Uyoyihlaba imvu yeduna lapho kuhlatshelwa khona umnikelo wesono nomnikelo wokushiswa, endaweni engcwele, ngokuba umnikelo wecala njengomnikelo wesono, ungowomphristi; ungcwelengcwele. ₁₄Umphristi uyothatha elinye igazi lomnikelo wecala, alibhece endlebeni yesokudla yalowo ohlanjululwayo, nasesithupheni sesandla sakhe sokunene, nakuqukula wonyawo lwakhe lwesokunene. ₁₅Umphristi uyothatha amanye amafutha kulo ilogi, awathele entendeni yesandla sakhe sokhohlo; ₁₆agcobhoze umunwe wakhe wesokunene emafutheni asesandleni sakhe sokhohlo, achinse amafutha ngomunwe wakhe kasikhombisa phambi kukaSimakade. ₁₇Amanye amafutha asele esandleni sakhe umphristi uyowagcoba endlebeni yesokunene yalowo ohlanjululwayo, nasesithupheni sesandla sakhe sokunene, nakuqukula wonyawo lwakhe lwesokunene, phezu kwegazi lomnikelo wecala. ₁₈Amafutha aseleyo esandleni somphristi uyowagcoba ekhanda lalowo ozohlanjululwa, bese umphristi emenzela ukubuyisana phambi kukaSimakade.

₁₉“Umphristi uyonikela umnikelo wesono, ewenzela lowo ohlanjululwayo ukuze athole ukubuyisana ngenxa yokungcola kwakhe, andukuba ahlabe umnikelo wokushiswa. ₂₀Umphristi uyonikela ngomnikelo wokushiswa nangomnikelo wokusanhlamvu e-althare; amenzele ukubuyisana, ahlambuluke.

₂₁“Uma empofu, engenakuphumelela kulokho, uyothatha imvu eyodwa eyiduna ibe ngumnikelo wecala, uzungeziswe ukumenzela ukubuyisana, nokukodwa eshumini kwempuphu ecolisekileyo exovwe namafutha, kube ngumnikelo wokusanhlamvu, nengxenye yelogi lamafutha, ₂₂namahobhe amabili noma amaphuphu amabili amajuba, ngokwamandla akhe. Elinye liyoba ngumnikelo wesono. Elinye libe ngumnikelo wokushiswa.

₂₃“Ngosuku lwesishiyagalombili uyowaletha kumphristi ngasemnyango wethende lokuhlangana, phambi kukaSimakade, abe ngawokuhlanjululwa kwakhe. ₂₄Umphristi uyothatha imvu yomnikelo wecala nengxenye yelogi lamafutha, uyokuzungezisa kube ngumnikelo wokuzungeziswa phambi kukaSimakade. ₂₅Uyohlaba imvu yomnikelo wecala, athathe igazi lomnikelo wecala, alibhece endlebeni yesokunene yohlanjululwayo, nasesithupheni sakhe sakwesokunene, nakuqukula wakhe wesokunene. ₂₆Umphristi uyothela amanye alawa mafutha entendeni yesandla sakhe sokhohlo; ₂₇achinse kasikhombisa ngomunwe wakhe wesokunene phambi kukaSimakade amanye amafutha asesandleni sakhe sokhohlo. ₂₈Umphristi uyothatha amafutha asesandleni sakhe, awagcobe endlebeni yesokunene yohlanjululwayo, nasesithupheni sakhe sakwesokunene, nakuqukula wakhe wesokunene, akwenzele endaweni yegazi lomnikelo wecala. ₂₉Amafutha asele esandleni somphristi uyowagcoba ekhanda lohlanjululwayo ukumenzela ukubuyisana phambi kukaSimakade. ₃₀Uyonikela ngelinye lamahobhe noma ngelinye lamaphuphu ejuba, njengalokhu engaphumelela ukwenza. ₃₁Elilodwa libe ngelomnikelo wesono, elinye libe ngelomnikelo wokushiswa nomnikelo wokusanhlamvu. Umphristi uyomenzela ohlanjululwayo ukubuyisana phambi kukaSimakade.”

₃₂Lena yindlela yomthetho eyolandelwa kulowo onesifo sochoko, ongenawo amandla okuba nomnikelo oqondene nokuhlanjululwa kwakhe.

₃₃USimakade wakhuluma kuMose no-Aroni, wathi: ₃₄“Kuyothi lapho senifikile eKhanani engizakuninika lona libe yifa lenu, ngibeke isifo sochoko endlini, ezweni eniliphiweyo. ₃₅Umninindlu uyoza atshele umphristi, athi: ‘Kungathi kuvele isifo esithile endlini yami.’ ₃₆Umphristi uyoyala ukuba kukhishwe okuphakathi endlini ngaphambi kokuba angene ukuyohlola ukuthi sikhona yini isifo, ukuze konke okusendlini kungangcoli, andukuba umphristi angene ukuhlola indlu. ₃₇Uyohlola ukuthi isifo sikhona yini, uma isifo sisezindongeni zendlu, kukhona amabala aluhlazana noma abomvana, nokubonakala kwawo kujulile kunodonga, ₃₈umphristi uyophuma aye ngasemnyango wendlu, ayivale indlu izinsuku eziyisikhombisa. ₃₉Umphristi uyobuya ngosuku lwesikhombisa, ukuhlola ukuthi ibala landile yini odongeni lwendlu. ₄₀Umphristi uyoyala ukuba amatshe ahlaselwe yisifo akhishwe, alahlwe endaweni engcolileyo ngaphandle komuzi. ₄₁Indlu iyophalwa ngaphakathi nhlangothi zonke, uthuli oluphaliweyo baluthele endaweni engcolileyo ngaphandle komuzi. ₄₂Bayothatha amanye amatshe bawafake endaweni yalawo akhishiweyo. Bayothatha udaka olusha bagudule ngalo indlu.

₄₃“Uma isifo sibuye savumbuka kabusha endlini emveni kokuba ekhiphe amatshe okuqala, nasemveni kokuphalwa kwendlu nokuphahlekwa kwayo, ₄₄umphristi uyohamba ayoyihlola. Uma isifo sandile endlini, kunochoko olubi olwandayo endlini; ingcolile. ₄₅Uyoyibhidliza indlu, amatshe ayo, amapulangwe ayo, nodaka lwayo akukhiphe emzini, akulahle endaweni engcolileyo.

₄₆“Oyongena endlini ngezinsuku isavaliwe uyakuba ngongcolileyo kuze kuhlwe. ₄₇Oyolala kuleyo ndlu noyodlela kuyo makahlanze izingubo zakhe.

₄₈“Uma umphristi efika ukuzoyihlola, athole ukuthi isifo asandile endlini emveni kokugudulwa kwayo, umphristi uyakumemezela ukuthi indlu ihlambulukile, ngokuba isifo siphelile. ₄₉Uyothatha izinyoni ezimbili, umsedari, indwangu ebomvu nehisopi, ukuze ahlambulule indlu. ₅₀Enye yezinyoni uyoyihlabela esitsheni sebumba phezu kwamanzi agelezayo. ₅₁Uyothatha umsedari, ihisopi, indwangu ebomvu nenyoni ephilayo, akucwilise egazini lenyoni ehlatshiweyo nasemanzini agelezayo, ayifafaze indlu kasikhombisa. ₅₂Uyakuyihlambulula indlu ngegazi lenyoni, ngamanzi agelezayo, ngenyoni ephilayo, ngomsedari, ngehisopi, nangendwangu ebomvu. ₅₃Uyoyiyeka inyoni ephilayo, indize iphume emzini iye endle, ayenzele kanjalo indlu ukubuyisana; ihlambuluke.”

₅₄Lena yindlela yomthetho eyolandelwa ngesifo sochoko esiyizinhlobonhlobo nangomuna: ₅₅uchoko lwengubo, olwendlu, ₅₆olweguludla, olotwayi, nolwebala elikhanyayo, ₅₇ukufundisa ukuthi kunini lapho umuntu engcolile nalapho ehlambulukile; yilowo-ke umthetho wochoko.