ILevithikhusi 13

₁USimakade wakhuluma kuMose no-Aroni, wathi: ₂“Uma umuntu emilwa iguludla esikhumbeni noma siba notwayi, noma yibala elikhanyayo bese liphenduka libe wuchoko, lowo muntu uyakulethwa ku-Aroni, umphristi, noma kwenye yamadodana akhe, angabaphristi. ₃Umphristi uyosihlola isifo esisesikhumbeni sakhe; uma uboya obusebaleni sebuphenduke baba mhlophe, nesifo sibonakala ukuthi sijulile esikhumbeni sakhe, kuyisifo esinzima, umphristi uyakukubona lokho bese ememezela ukuthi ungcolile. ₄Uma ibala elikhanyayo limhlophe esikhumbeni senyama yakhe, futhi libonakala lijulile esikhumbeni, noboya obukulo sebuphenduke baba mhlophe, umphristi uyakumvalela onesifo izinsuku eziyisikhombisa. ₅Umphristi uyakumhlola ngosuku lwesikhombisa, uma ebona ukuthi isifo simile asiqhubeki, umphristi uyakumvalela okwesibili ezinye izinsuku eziyisikhombisa. ₆Ngosuku lwesikhombisa uyakumhlola okwesibili, uma ibala lifiphele, nesifo singaqhubekanga, uyakumemezela ukuthi uhlambulukile, bekulutwayi, ageze izingubo zakhe, abe ngohlambulukile. ₇Kepha uma utwayi luqhubekile lwanda esikhumbeni emveni kokuba esezibonakalisile kumphristi ukuze kuqiniswe ukuthi usehlambulukile, uyophinde azibonakalise kumphristi okwesibili. ₈Umphristi uyakumbheka; uma ebona ukuthi utwayi lwandile esikhumbeni, uyakumemezela ukuthi ungcolile; kusho ukuthi unesifo sesikhumba esithathelanwayo.

₉“Uma umuntu etheleleke ngesifo sochoko, uyakuyiswa kumphristi, ₁₀umphristi uyakumbheka, uma ebona ukuthi lapho isikhumba sivuvukele khona sekumhlophe, noboya sebuphenduke baba mhlophe nokuthi kukhona inyama ebomvu ekuvuvukeni; ₁₁kusho ukuthi unesifo esinzima esithathelanwayo esisekhumbeni sakhe. Umphristi uyakumemezela ukuthi ungcolile, akayukumvalela, ngoba ungcolile.

₁₂“Uma uchoko lubhebhetheka lusibekele sonke isikhumba sakhe, kusukela ekhanda kuze kufike ezinyaweni njengokubona komphristi, ₁₃umphristi uyakumhlola, kuthi uma isifo sesiwemboze wonke umzimba, uyakusho athi onesifo uhlambulukile; konke kuphendukile kwaba mhlophe: uhlambulukile. ₁₄Kepha njalo uma kuphinda kuvela kuye inyama ebomvu, uyakuba ngongcolile. ₁₅Umphristi uyakuyihlola inyama ebomvu, bese ememezela ukuthi ungcolile; inyama ebomvu ingcolile ngokuba inochoko. ₁₆Uma-ke inyama ebomvu ibuye yaphenduka yaba mhlophe uyakuya kumphristi, ₁₇umphristi uyakumhlola, uma ibala seliphenduke laba mhlophe, umphristi uyakumemezela ukuthi uhlambulukile; obenesifo uhlambulukile.

₁₈“Uma bekunethumba esikhumbeni sayo eselipholile, ₁₉kuthi lapho bekunethumba khona kuvele iguludla elimhlophe, noma ibala elikhanyayo okubomvana kube mhlophe, liyakukhonjiswa umphristi, ₂₀umphristi uyakulihlola, uma libonakala lishonile kunesikhumba, futhi noboya sebuphenduke baba mhlophe, umphristi uyakumemezela ukuthi ungcolile: yisifo esithathelanwayo, sivele ethumbeni. ₂₁Uma umphristi elihlola kodwa bungekho uboya obumhlophe kulo, futhi lingashonile kunesikhumba, kepha selifiphele, umphristi uyakumvalela izinsuku eziyisikhombisa. ₂₂Uma libhebhetheka esikhumbeni, umphristi uyakumemezela ukuthi ungcolile; yisifo. ₂₃Kodwa uma ibala elikhanyayo limi endaweni eyodwa lingaqhubeki, sekuyisibazi sethumba; umphristi uyakumemezela ukuthi uhlambulukile.

₂₄“Uma umzimba unesibazi sokusha, inyama lapho kushe khona ibe yibala elibomvu ngokumhlophe noma elimhlophe, ₂₅umphristi uyakulihlola, uma uboya obusebaleni elikhanyayo sebuphendukile baba mhlophe, selibonakala ukuthi lishonile kunesikhumba, isifo esithathelanwayo; sivele esibazini; umphristi uyakumemezela ukuthi ungcolile; yisifo esithathelanwayo. ₂₆Kepha uma umphristi elihlola, ebona kungekho boya obumhlophe ebaleni elikhanyayo, lingashonile kunesikhumba, kodwa lifiphele, umphristi uyakumvalela izinsuku eziyisikhombisa. ₂₇Ngosuku lwesikhombisa uyomhlola, uma libhebhethekile esikhumbeni, umphristi uyakumemezela ukuthi ungcolile; yisifo esithathelanwayo. ₂₈Uma ibala elikhanyayo limi endaweni eyodwa, lingandanga esikhumbeni, kodwa lishabalele, kusele iguludla lesibazi; umphristi uyakusho ukuthi uhlambulukile, ngoba yisibazi sokusha.

₂₉“Uma owesilisa noma owesifazane enesifo ekhanda, noma esilevini, ₃₀umphristi uyakusihlola isifo; uma sibonakala sishonile kunesikhumba noboya bubuncane kuso, izinwele zimpofana, umphristi uyakumemezela ukuthi ungcolile: ngumuna, wuchoko lwekhanda noma lwesilevu. ₃₁Uma umphristi esihlola isifo somuna, sibonakala singashonile kunesikhumba, kungekho zinwele ezimnyama kuso, khona umphristi uyakumvalela onesifo somuna izinsuku eziyisikhombisa. ₃₂Ngosuku lwesikhombisa umphristi uyosihlola isifo; uma singandile futhi kungekho zinwele ezimpofu kuso, isifo sibonakala singashonile kunesikhumba, ₃₃uyakuphuca izinwele, kodwa akayukuwuphuca umuna, umphristi uyomvalela onomuna ezinye izinsuku eziyisikhombisa. ₃₄Ngosuku lwesikhombisa uyomhlola onomuna. Uma umuna ungandanga esikhumbeni, futhi ubonakala ungashonile kunesikhumba, umphristi uyakumemezela ukuthi uhlambulukile. Uyohlanza izingubo zakhe, ahlambuluke. ₃₅Kepha uma umuna wandile esikhumbeni emveni kokuba esehlambulukile, ₃₆umphristi uyobuye amhlole. Uma umuna ubhebhethekile esikhumbeni, umphristi akayukuzihlupha abheke izinwele ezimpofu; lowo ungcolile. ₃₇Kodwa uma ebona ukuthi umuna uwuhlolile, umile, awandi, sekumile nezinwele ezimnyama kuwo, usupholile, uhlambulukile; ngakho-ke umphristi uyomemezela ukuthi uhlambulukile.

₃₈“Uma owesilisa noma owesifazane eba namabala akhanyayo esikhumbeni sakhe, amabala amhlophe akhanyayo, ₃₉umphristi uyomhlola. Uma amabala akhanyayo asesikhumbeni sakhe emhloshana efiphele, yisithembuzane esimmilile, uhlambulukile.

₄₀“Uma umuntu elahlekelwa yizinwele ekhanda, eba yimpandla; uhlambulukile. ₄₁Uma elahlekelwa yizinwele zisuka ebunzini nasenhlafunweni, uyimpandla ebunzini kodwa uhlambulukile. ₄₂Kepha uma ekhanda eliyimpandla noma empandleni esesiphongweni kukhona isifo esibomvana ngokumhlophe, wuchoko lolo olumile empandleni esekhanda lakhe noma empandleni esebunzini lakhe, ₄₃umphristi uyakumhlola; uma iguludla elikhulayo limhlophe libomvana empandleni esekhanda lakhe noma empandleni esebunzini lakhe, lifana nesifo sochoko esikhumbeni sakhe, ₄₄unochoko; ungcolile; umphristi uyakumemezela ukuthi ungcolile; isifo sisekhanda lakhe.

₄₅“Umuntu onesifo sochoko ziyakuklejulwa izingubo zakhe, ikhanda lakhe linganakwa, awamboze amadevu, akhale athi: ‘Ngingcolile! Ngingcolile!’ ₄₆Ungcolile ngaso sonke isikhathi. Uyohlala yedwa endlini yakhe engaphandle kwenkambu.

₄₇“Ingubo esinindeke ngesifo sochoko, noma yingubo yoboya noma yingubo yelineni, ₄₈noma ngabe sisezintanjeni eziqondileyo noma sikwezinqamulayo, ezelineni noma ezoboya bezimvu, noma sisesikhumbeni, noma sisentweni eyenziwe ngesikhumba, ₄₉uma ibala liluhlazana noma libomvana engutsheni noma esikhumbeni noma ezintanjeni eziqondileyo noma kwezinqamulayo noma entweni yesikhumba, kusho ukuthi yisifo sochoko, siyakukhonjiswa umphristi. ₅₀Umphristi uyakusihlola isifo, akuvalele konke lokho okunochoko izinsuku eziyisikhombisa, ₅₁uyobuye ayosihlola isifo ngosuku lwesikhombisa. Uma isifo sandile engutsheni noma ezintanjeni eziqondileyo noma kwezinqamulayo noma esikhumbeni, nakuba isikhumba sisetshenziswa noma kumuphi umsebenzi; isifo siluchoko olubi. ₅₂Uyoyishisa ingubo, noma izintanjana eziqondileyo noma ezinqamulayo, noma eyoboya bezimbuzi noma eyelineni, noma yini yesikhumba enesifo, ngokuba kuluchoko olubi; kuyakushiswa ngomlilo.

₅₃“Uma umphristi ehlole isifo, wathola ukuthi asandile engutsheni noma ezintanjeni eziqondileyo noma kwezinqamulayo noma entweni yesikhumba; ₅₄umphristi uyoyala ukuba kuhlanzwe lokho okunesifo, kuvalelwe ezinye izinsuku eziyisikhombisa. ₅₅Umphristi uyobuye akuhlole emveni kokuhlanzwa kwesifo. Uma ibala lingaguqukile embaleni walo, lingandile, ingcolile, uyoyishisa ngomlilo; kungumcothu odlayo noma ngaphakathi noma ngaphandle. ₅₆Uma umphristi eselihlolile ibala, wathola ukuthi selifiphele emveni kokuba lihlanziwe, uyakuliklebhula engutsheni noma esikhumbeni noma ezintanjeni eziqondileyo noma kwezinqamulayo. ₅₇Uma lisabonakala futhi engutsheni noma ezintanjeni eziqondileyo noma kwezinqamulayo noma entweni yesikhumba, uyokushisa ngomlilo lokho isifo esisavela kukho. ₅₈Ingubo noma izintanjana eziqondileyo noma ezinqamulayo noma yini yesikhumba uyakuyihlanza, uma ibala lisuka kuyo, kuyohlanzwa okwesibili, kuhlambuluke.”

₅₉Lena yindlela yomthetho eyakulandelwa esifeni sochoko engutsheni yoboya bezimvu noma kweyelineni noma ezintanjeni eziqondileyo noma kwezinqamulayo noma entweni yesikhumba, ukumemezela ukuthi kuhlambulukile noma kungcolile.