UJoshuwa 21

₁Kwase kusondela izinhloko zemindeni yabaLevi ku-Eleyazare, umphristi benoJoshuwa, indodana kaNuni, nezinhloko zemindeni yezizwana zakwa-Israyeli; ₂zakhuluma kubo eShilo eKhanani, zathi: “USimakade wayala ngoMose ukuba sinikwe imizi esizohlala kuyo namadlelo emfuyo yethu.”

₃Ngakho-ke ngokomyalo kaSimakade abakwa-Israyeli banika abaLevi le mizi elandelayo namadlelo ayo, kwaba yifa labo.

₄Unkatho lwadla imindeni yamaKhohathi. Ngakho-ke abaLevi abengabozalo luka-Aroni, umphristi, bathola ngonkatho imizi eli-13 esizwaneni sakwaJuda, esakwaSimeyoni, nesakwaBhenjamini.

₅Basalayo bozalo lukaKhohathi bathola ngonkatho imizi elishumi emindenini yesizwana sakwa-Efrayimi, nesakwaDani, nasengxenyeni yesizwana sakwaManase.

₆Abozalo lukaGerishoni bathola imizi eli-13 emindenini yesizwana sakwa-Isakhare, esakwa-Asheri, esakwaNafethali nasengxenyeni yesizwana sakwaManase, eBhashani.

₇Abozalo lukaMerari, ngokwemindeni yabo, bathola imizi eli-12 esizwaneni sakwaRubeni, esakwaGadi, nesakwaZebuloni.

₈Abakwa-Israyeli bababela abaLevi ngonkatho leyo mizi namadlelo ayo; njengalokhu uSimakade ayemyalile uMose.

₉Esizwaneni sabozalo lukaJuda nabolukaSimeyoni abaLevi bathola le mizi elandelayo ebizwe ngamagama, ₁₀yaba ngeyabozalo luka-Aroni, bemindeni yamaKhohathi ayengabaLevi, selokhu bakhonjwa wunkatho lokuqala.

₁₁Bawanika iKiriyathi Arbha okuyiHebhroni, umuzi kayise ka-Anaki, ezintabeni kwaJuda namadlelo awo nxazonke zawo. ₁₂Kodwa amasimu omuzi nemizana yawo bakunika uKhalebhu indodana kaJefune kwaba yifa lakhe.

₁₃IHebhroni umuzi wokuphephela umbulali namadlelo alo, iLibhina namadlelo alo, bakunika abozalo luka-Aroni umphristi, ₁₄iJathiri namadlelo alo, i-Eshithemowa namadlelo alo, ₁₅iHoloni namadlelo alo, iDebhiri namadlelo alo, ₁₆i-Ayini namadlelo alo, iJutha namadlelo alo, neBhethi Shemeshi namadlelo alo, imizi eyisishiyagalolunye ivela kulezi zizwana ezimbili.

₁₇Esizwaneni sakwaBhenjamini bathola: iGibheyoni namadlelo alo, iGebha namadlelo alo, ₁₈i-Anathothi namadlelo alo, ne-Alimoni namadlelo alo, imizi emine.

₁₉Imizi yabozalo luka-Aroni, abaphristi, yayili-13 namadlelo ayo.

₂₀Yonke eminye imindeni yobozalo lukaKhohathi abaLevi abasalayo ozalweni lukaKhohathi, banikwa ngonkatho imizi esizwaneni sakwa-Efrayimi.

₂₁Banikwa iShekhemi namadlelo alo, kwelezintaba kwa-Efrayimi, umuzi wokuphephela umbulali, iGezeri namadlelo alo, ₂₂iKhibhizayimi namadlelo alo, neBhethi Horoni namadlelo alo, imizi emine.

₂₃Esizwaneni sakwaDani: i-Elitheke namadlelo alo, iGibhethoni namadlelo alo, ₂₄i-Ajaloni namadlelo alo, iGathi Rimoni namadlelo alo, imizi emine.

₂₅Engxenyeni yesizwana sakwaManase bathola: iThanakhi namadlelo alo, neGathi Rimoni namadlelo alo, imizi emibili.

₂₆Imizi yemindeni yobozalo lukaKhohathi ababesasele yayilishumi isiyonke namadlelo ayo.

₂₇Abozalo lukaGerishoni, omunye wemindeni yabaLevi, banikwa engxenyeni yesizwana sakwaManase, iGolanu eBhashani namadlelo alo, umuzi wokuphephela umbulali, neBheyeshithera namadlelo alo, imizi emibili. ₂₈Esizwaneni sakwa-Isakhare bathola: iKhishiyoni namadlelo alo, iDabherathi namadlelo alo, ₂₉iJarimuthi namadlelo alo, ne-Eni Ganimi namadlelo alo, imizi emine.

₃₀Esizwaneni sakwa-Asheri bathola: iMishali namadlelo alo, i-Abhidoni namadlelo alo, ₃₁iHelikhathi namadlelo alo, neRehobhe namadlelo alo, imizi emine.

₃₂Esizwaneni sakwaNafethali bathola: iKedeshi eGalile namadlelo alo, umuzi wokuphephela umbulali, iHamothi Dori namadlelo alo, neKharithani namadlelo alo, imizi emithathu.

₃₃Yonke imizi yamaGereshoni ngemindeni yawo namadlelo ayo yayili-13.

₃₄Kulabo baLevi ababesasele, ozalweni lukaMerari yanikezelwa esizwaneni sakwaZebuloni: iJokineyamu namadlelo alo, iKharitha namadlelo alo, ₃₅iDimina namadlelo alo, neNahalali namadlelo alo, imizi emine.

₃₆Esizwaneni sakwaRubeni bathola: iBhezeri namadlelo alo, iJahazi namadlelo alo, ₃₇iKhedemothi namadlelo alo, neMefahathi namadlelo alo, imizi emine.

₃₈Esizwaneni sakwaGadi bathola: iRamothi kwaGileyadi namadlelo alo, umuzi wokuphephela umbulali, iMahanayimi namadlelo alo, ₃₉iHeshibhoni namadlelo alo, neJazeri namadlelo alo, imizi emine isiyonke.

₄₀Maqondana nemizi yozalo lwamaMerari ayesasele, imindeni yabaLevi, yona yabelwa imizi eli-12 isiyonke.

₄₁Isiyonke imizi yabaLevi eyayiphakathi kwesabelo sabakwa-Israyeli yayingama-48 namadlelo ayo. ₄₂Umuzi ngamunye waleyo mizi wawuzungezwe ngamadlelo awo, wonke ayenjalo.

₄₃USimakade wamnika kanjalo u-Israyeli lonke izwe ayefunge kokhokho bakhe ukuthi uzobanika lona; sebelidlile laba yisabelo sabo, bahlala kulo. ₄₄USimakade wayesebapha ukuthula nhlangothi zonke njengalokhu ayefungile kokhokho babo; akukho nasinye ezitheni zabo esama phambi kwabo, ngokuba uSimakade wayezinikele zonke izitha zabo ezandleni zabo. ₄₅Akukho nasinye kulezo zithembiso ezinhle uSimakade ayezethembise indlu ka-Israyeli esingafezekanga; zonke zafezeka.