UJobe 33

₁“Kepha manje, Jobe, ake ungilalele,

yizwa amazwi ami.

₂Ngivula umlomo wami,

ulimi lwami luyakhuluma.

₃Amazwi ami aveza ubuqotho

benhliziyo yami,

lokho izindebe zami ezikwaziyo,

zikukhuluma ngeqiniso.

₄UMoya kaNkulunkulu ungenzile,

nokuphefumula kukaSomandla kunginika ukuphila.

₅Ngiphendule, uma ukwazi,

hlela amazwi akho phambi kwami,

ume ubhekane nami.

₆Bheka, phambi kukaNkulunkulu ngifana nawe nje,

nami ngibunjwe ngodongwe.

₇Ungesabi ungangenwa ngamanzi emadololweni,

nesandla sami asizukuba nzima phezu kwakho.

₈“Impela ukhulumile, ngizizwela ngezami izindlebe,

ngawezwa amazwi owashilo.

₉Uthi: ‘Ngimsulwa, anginasiphambeko,

ngilungile, akukho okubi kimi.

₁₀Uthole amathuba okumelana nami,

ungishaya isitha sakhe.

₁₁Ufaka izinyawo zami ezingongolweni,

aqaphe zonke izinyathelo zami.’

₁₂“Kulokhu awukhulumanga kahle.

Ngizokuphendula, uNkulunkulu mkhulu kunomuntu.

₁₃Kungani uqagulisana naye,

ngokuthi akaphenduli nelilodwa lamazwi ami.

₁₄Empeleni, uNkulunkulu ukhuluma ngendlela eyodwa,

noma ezimbili,

nokho umuntu akakunaki lokho.

₁₅Ephusheni nasembonweni ebusuku,

lapho abantu belele ubuthongo obunzima,

bethe zwi emibhedeni yabo,

₁₆khona uyazivula izindlebe zabantu,

abethuse ngezexwayiso zakhe,

₁₇ukuze amphendule umuntu ezenzweni zakhe,

ashabalalise ukuzidla kumuntu.

₁₈Umphefumulo wakhe awuphephise egodini,

nokuphila kwakhe kungabhujiswa ngomkhonto.

₁₉Uyajeziswa ngobuhlungu esecansini lakhe,

nangokunkenketha okungapheliyo emathanjeni akhe.

₂₀Inhliziyo yakhe iyanengwa ngukudla,

nomphefumulo wakhe uyakwenyanya ukudla

akade ekufisa.

₂₁Umzimba wakhe uyancunzeka,

uphele emehlweni,

amathambo akhe akade engabonakali

ahlale obala.

₂₂Umphefumulo wakhe usondela egodini,

nempilo yakhe, kubabulali.

₂₃“Uma bekungaba khona ingelosi,

ummeli abe munye enkulungwaneni,

obeyothi lo muntu ulungile,

₂₄uNkulunkulu abe nomusa kuye, athi:

‘Mhlenge angehleli egodini, ngisitholile isihlengo,’

₂₅isikhumba sakhe sibe njengesomntwana,

abuyele emihleni yobusha bakhe,

₂₆khona uyakukhuleka kuNkulunkulu,

Yena amamukele,

eze kuye ngentokozo,

uNkulunkulu ambuyiselele ukulunga kwakhe.

₂₇Lo muntu bese ebheka abantu,

athi: ‘Ngonile, ngahlanekezela okulungileyo,

kodwa akwenzekanga kimi njengokufanele.

₂₈Uwuhlengile umphefumulo wami,

awaze wedlulela egodini;

impilo yami izokubona ukukhanya.’

₂₉“Konke lokhu

uNkulunkulu uyakwenza kumuntu kabili,

yebo, nakathathu,

₃₀ukuze awubuyise umphefumulo wakhe egodini,

akhanyiselwe ngokukhanya kokuphila.

₃₁Yizwa Jobe, ngilalele,

thula, mina ngizakukhuluma.

₃₂Uma unamazwi, ngiphendule,

khuluma, ngokuba

ngifisa ukukuthethelela.

₃₃Uma ungenawo, ngilalele,

thula, ngiyakukufundisa ukuhlakanipha.”