UJobe 30

₁“Manje sengihlekwa ngabancane kunami ngeminyaka,

oyise engangingeke ngibabeke phakathi

kwezinja ezelusa izimvu zami.

₂Ngingazuzani emandleni ezandla zabo,

njengoba sebentekenteke na?

₃Bondile ngenxa yokweswela nangendlala,

sebeququda okomileyo,

nomhlabathi oliqwaqwasi,

₄bakha imifino ebabayo ehlozini,

badle amagonsi.

₅Bayaxoshwa emphakathini,

abantu bamemeza emva kwabo

sengathi kusemva kwamasela.

₆Bahlala ezigodini ezesabekayo,

emihumeni nasemaweni.

₇Babhonga phakathi kwezihlahla,

babuthane phansi kwembabazane,

₈bangabantwana beziwula,

abantwana babantu abangenagama,

bayashaywa, baxoshwe ezweni.

₉“Manje sengiphenduke ingoma yabo yokubhinqa,

impela sengiyisaga sabo.

₁₀Bayangenyanya, bamela kude nami,

abayeki ukungikhafulela ngamathe.

₁₁Ngokuba uNkulunkulu ungishiye ngingavikelekile,

wangithobisa,

sebenza noma yini abayifisayo kimi.

₁₂Ngakwesokunene sami,

kuvuke uquqaba lwangihlasela,

lwangenza ngabaleka;

lufuna ukungibhubhisa.

₁₃Luvimba endleleni yami

ukuze luzuze ngokubhujiswa kwami,

akukho namunye oluvimbayo.

₁₄Lungithelekela ngokungathi, kuvuleke isikhala esikhulu

phakathi kwencithakalo.

₁₅Ngikhungethwe yingebhe;

udumo lwami luxoshwa

sengathi lupheshulwa ngumoya,

impumelelo yami inyamalele njengefu.

₁₆“Manje umphefumulo wami

uyalila ngaphakathi kwami,

izinsuku zosizi zingibambile.

₁₇Ubusuku bugwaza amathambo ami

awohloke kimi;

nobuhlungu obungidlayo abupheli.

₁₈Ngamandla akhe amakhulu,

ubambe ingubo yami,

ungibambe ngentamo yesembatho sami.

₁₉Ungiphonse odakeni,

sengifana nothuli nomlotha.

₂₀“Ngikhala kuwe,

kodwa awungiphenduli,

ngimi lapha,

kepha awunginaki.

₂₁Usungiphendukele,

waba nonya kimi;

uyangihlukumeza ngamandla esandla sakho.

₂₂Ungiphakamisele emoyeni,

wangikhweza kuwo,

wangiphonsa le nale

ngokuhlokoma kwesivunguvungu.

₂₃Ngiyazi ukuthi uzongiyisa ekufeni

nasendlini okubuthanela kuyo

bonke abaphilayo.

₂₄“Impela umuntu akayukumfulathela owentulayo

lapho esekuhluphekeni,

ekhala ecela usizo.

₂₅Angimkhalelanga yini

ozinsuku zakhe zinzima na?

Umphefumulo wami

awubahawukelanga yini abampofu na?

₂₆Lapho ngilindele okuhle,

kwafika okubi,

ngalindela ukukhanya, kwafika ubumnyama.

₂₇Izibilini zami ziyaxhuxhuzela, azithuli;

ngihlangabezana nezinsuku zosizi.

₂₈Sengize ngaba mnyama,

kodwa ngingashiswa langa,

ngimi ebandleni,

ngikhala ngicela usizo.

₂₉Sengingumfowabo wamakhanka,

nomngani wezintshe.

₃₀Isikhumba sami sesimnyama,

siyaxebuka;

amathambo ami ayavutha ngukushisa.

₃₁Ihabhu lami seliphenduke isililo,

nomtshingo wami uyizwi labakhalayo.”