UJobe 29

₂“Sengathi ngabe nginjengasezinyangeni ezedlule,

nanjengasezinsukwini lapho uNkulunkulu ayengiqaphile,

₃lapho isibani sakhe sasikhanya

phezu kwekhanda lami,

ngihamba ebumnyameni ngokukhanya kwakhe,

₄njengoba nganginjalo ezinsukwini zobunsizwa bami,

lapho ubukhona bukaNkulunkulu

babuphezu kwethende lami,

₅lapho uSomandla esenami,

nabantwana bami besangizungezile,

₆lapho izinyathelo zami

zazigezwa ezaqheqheni,

nedwala elaliseduze kwami

lalingithelela imifula yamafutha.

₇“Lapho ngiphuma ngiya esangweni lomuzi,

nalapho ngihlala esihlalweni sami esigcawini,

₈izinsizwa zazingibona maqede zicashe,

izimpunga zisukume zime,

₉izikhulu ziyeke ukukhuluma,

zibeke izandla zazo emilonyeni,

₁₀izwi lezikhulu lalithuliswa,

ulimi lwazo lunamathele olwangeni.

₁₁Indlebe engizwayo, yayithi ngibusisiwe,

neso elingibonayo lingifakazela,

₁₂ngokuba ngakhulula abampofu abakhalayo,

nezintandane ezingenamsizi.

₁₃Isibusiso sowayesezobhubha sasehlela kimi,

ngayenza yahuba ngenjabulo inhliziyo yomfelokazi.

₁₄Ngembatha ukulunga,

kwaba njengesembatho kimi,

ubulungiswa kimi baba njengengubo nomqhele.

₁₅Ngaba ngamehlo abayizimpumputhe

nezinyawo zabayizinyonga.

₁₆Ngaba nguyise wabantulayo,

ngaluphenyisisa udaba lwalowo engingamaziyo.

₁₇Ngayifahlaza imihlathi yongalungile,

ngahlwitha impango emazinyweni akhe.

₁₈“Ngase ngithi:

‘Ngizofela emzini wami;

izinsuku zami ngizandise

zibe ngangesihlabathi.

₁₉Impande yami iyokwenabela emanzini,

kulale amazolo egatsheni lami

ubusuku bonke;

₂₀udumo lwami luba lusha njalo,

nomnsalo wami wenziwe musha

esandleni sami.’

₂₁“Abantu bebengilalela,

balinde,

bathule cwaka,

balalele iseluleko sami.

₂₂Uma sengikhulumile kwakungaphinde kukhulume muntu,

amazwi ami ayeconsela phezu kwabo njengamazolo.

₂₃Babengilindela njengemvula,

bakhamise imilomo yabo

njengonxanele imvula yasentwasahlobo.

₂₄Ngabahleka bangakholwa,

ukuchachamba kobuso bami abakuqedanga.

₂₅Ukuba ngangikhethe izindlela zabo,

ngangizohlala ngingumholi,

nginjengenkosi phakathi kwamabutho,

njengoduduza abalilayo.”