UJobe 12

₂ “Akuthandabuzwa ukuthi yini nodwa abantu,

nokuhlakanipha kuyofa nani.

₃Kepha nami nginengqondo njengani,

aningedluli ngalutho.

Ngubani ongazazi izinto ezinjengalezi na?

₄Sengiyinhlekisa kumngani wami,

mina ebengikhala kuNkulunkulu angiphendule;

umuntu olungileyo nongenasici, useyisigcono.

₅Labo abahleli kahle

bayibukela phansi ingozi,

ilungiselelwe abanezinyawo ezishelelayo.

₆Amathende abaphangi anokuthula,

abachukuluza uNkulunkulu balondekile,

labo abaletha onkulunkulu babo

ngezandla zabo.

₇Kepha ake ubuze izilwane,

zizokufundisa,

nezinyoni zezulu, ukuze zikutshele.

₈Khuluma kuwo umhlaba,

ukuze ukufundise,

nasezinhlanzini zolwandle

ukuze zikulandise.

₉Ngubani phakathi kwabo bonke laba,

ongazi ngakho konke lokho

ukuthi isandla sikaSimakade

sikwenzile lokhu na?

₁₀Esandleni sakhe kukhona imiphefumulo

yakho konke okuphilayo,

kanjalo nomoya wabo bonke abaphilayo.

₁₁Indlebe ayiwahloli yini amazwi,

nolwanga alukunambithi yini ukudla na?

₁₂Ukuhlakanipha kutholakala ezimpungeni,

nangobude bezinsuku kwabanokuqonda.

₁₃“Ukuhlakanipha namandla kukuye,

amasu nokuqonda kungokwakhe.

₁₄Yena uma ebhidliza,

akekho ongakha kabusha,

uma evalela umuntu,

akekho ongamvulela.

₁₅Uyawavimba amanzi, ashe,

awathumele agumbuqele umhlaba.

₁₆Amandla nokuhlakanipha okungqokolo kungokwakhe,

oduka endleleni

nalowo omdukisayo bangabakhe.

₁₇Uyaphuca abeluleki ukuhlakanipha,

enze abehluleli babe yiziwula.

₁₈Uthukulula izintambo zamakhosi,

awabophe ngebhande ezinkalweni zawo.

₁₉Ugodukisa abaphristi bengenalutho,

athele phansi othulini izikhulu.

₂₀Uyazithulisa izindebe zabathembekileyo,

aphuce amalunga ukuqonda.

₂₁Uthela izikhulu ngehlazo,

athukulule amabhande abanamandla.

₂₂Wembula izinto ezijulileyo ebumnyameni,

aveze obala izinto ezisebumnyameni obukhulu.

₂₃Wenza izizwe zibe zinkulu,

bese ezibhubhisa,

ukhulisa izizwe,

bese ezihlakaza.

₂₄Uphuca abaholi bezizwe zomhlaba ukuqonda,

abahlwathizise lapho kungekho ndlela khona,

ehlane, kwahlongasibi.

₂₅Baphuphutheka ebumnyameni bengenakukhanya,

ubabhamazelisile njengezidakwa.”