UJeremiya 2

₂“ ‘Usho kanje uSimakade,

ngiyakukhumbula umusa wobusha bakho,

uthando lwakho njengomakoti,

nokuthi wangilandela kanjani ehlane,

ezweni okungatshalwanga lutho kulo.

₃U-Israyeli ungcwele kuSimakade,

uwulibo lwezithelo zakhe;

bonke abazidlayo bayothweswa icala,

behlelwe ngokubi,’ ” kusho uSimakade.

₄Yizwani izwi likaSimakade nina ndlu kaJakobe,

nani nonke mindeni yendlu ka-Israyeli.

“Bubi buni oyihlo ababufumana kimi,

ukuba baze badede babe kude nami,

balandele okuyize,

baphenduke ize nabo na?

₆Abashongo ukuthi:

‘Uphi uSimakade owasikhuphula eGibhithe,

wasihola ezweni eliyihlane nogwadule;

izwe lemigodi, nesomiso,

ezweni lethunzi lokufa,

elingadatshulwa muntu,

nalapho kungahlali muntu khona na?’

₇Nganingenisa ezweni elivundileyo

ukuba nidle izithelo zalo

nokuhle kwalo;

kepha lapho seningenile,

nalingcolisa izwe lami,

nenza ifa lami laba yisinengiso.

₈Abaphristi abashongo ukuthi:

‘Uphi uSimakade na?’

Abaphethe umthetho babengazi,

ababusi baphambuka kimi,

abaphrofethi baphrofetha ngoBhali,

balandela okungenakusiza.

₉“Ngakho-ke ngizophikisana nani,” kusho uSimakade,

“ngiyakuphikisana nanabantwana babantwana benu.

₁₀Welelani eziqhingini eKhithimi,

nibone, thumelani eKhedari,

niqonde kahle,

nibone ukuthi yake yenzeka yini

into enjengalena na?

₁₁Isizwe sake sabalahla yini

onkulunkulu baso,

noma bengesibo onkulunkulu na?

Kepha isizwe sami

silulahlile udumo lwaso ngokungenanzuzo.

₁₂Mangalani ngalokho, mazulu, nithuthumele,

nibe yincithakalo yoqobo,” kusho uSimakade.

₁₃“Ngokuba abantu bami benzile okubi okubili:

bangishiyile, Mina mthombo wamanzi aphilileyo;

bazigubhela imithombokwakhiwa,

imithombokwakhiwa evuzayo,

engenakuwagcina amanzi.

₁₄U-Israyeli uyisigqila esazalelwa ekhaya yini na?

Kungani pho abe yimpango na?

₁₅Amabhongo ezingonyama alibhozomela, akhonya,

alenza izwe lakhe laba yincithakalo;

imizi yakhona iyincithakalo,

akukho muntu owakhe kuyo.

₁₆Abantu baseNofi nabaseThahiphanesi

baluphucile ukhakhayi lwakho.

₁₇Akunguwe yini oziholele amanzi ngomsele,

ngokushiya uSimakade uNkulunkulu wakho

ngesikhathi ekuhola endleleni na?

₁₈Ngakho-ke uzuzeni ngokuya eGibhithe

uphuze amanzi eShihori na?

Uzuzeni ngokuya e-Asiriya,

ukuba uphuze amanzi omfula na?

₁₉Ububi bakho buyakukujezisa,

nokuhlubuka kwakho kuyakukusola;

yazi-ke, ubone ukuthi

ukuhlubuka uSimakade uNkulunkulu wakho

kuyinto embi nebaba kanjani;

akusekho ukungesaba kuwe,”

kusho iNkosi uSimakade Wamabandla.

₂₀“Ngokuba kwasemandulo walephula ijoka lakho,

wagqabula izibopho zakho,

wathi: ‘Angiyukukhonza.’

Ngokuba kuwo wonke amagquma aphakemeyo,

naphansi kwayo yonke imithi eluhlaza,

walala njengesifebe.

₂₁Mina ngakutshala ungumvini wekhethelo,

imbewu enhle kakhulu;

pho uphenduke kanjani

waba yigatsha elonakeleyo kimi,

elomvini wabezizwe na?

₂₂Ngokuba noma ugeza ngesoda,

uzithathele insipho eningi,

ububi bakho bulotshiwe phambi kwami,”

kusho iNkosi uSimakade.

₂₃“Ungakusho kanjani ukuthi:

‘Angingcolile,

angibalandelanga oBhali,’ na?

Bheka ukuziphatha kwakho esigodini,

ubone ukuthi wenzeni:

uyikamela lensikazi elinejubane,

elizulazula ezindleleni zalo,

₂₄nembongolo yasendle ejwayele ihlane,

esezela umoya ngokukhanuka kwayo;

ngubani ongavimbela inkanuko yayo na?

Bonke abayifunayo abayukukhathala,

bayakuyifumana ngenyanga yayo.

₂₅Nqanda unyawo lwakho lungabi olungenasicathulo,

nomphimbo wakho ukuba ungomi;

kepha wena wathi: ‘Kuyize;

qha, ngiyabathanda onkulunkulu babezizwe,

ngizobalandela.’

₂₆“Njengesela linxothoza lapho selibanjiwe,

iyakuba njalo nendlu yakwa-Israyeli;

iyokuba namahloni,

yona namakhosi ayo,

izikhulu zabo,

abaphristi babo, nabaphrofethi babo

₂₇abathi emthini: ‘Ungubaba,’

nasetsheni, bathi:

‘Wena wangizala.’

Bangifulathele, abangibheki,

kepha kuyothi ngesikhathi senhlekelele, bathi:

‘Vuka, usisindise.’

₂₈Baphi onkulunkulu bakho ozenzele bona na?

Mabavuke, uma bengakusindisa

ngesikhathi sokuhlupheka kwakho,

ngokuba njengomumo wemizi yakho,

banjalo onkulunkulu bakho, Juda.

₂₉“Kungani nimelana nami na?

Nonke niphambukile kimi,” kusho uSimakade.

₃₀“Abantwana benu ngibashayele ize,

abakwemukelanga ukuyalwa.

Inkemba yenu idle abaphrofethi benu

njengengonyama ebhubhisayo.

“Ngike ngaba yini yihlane ku-Israyeli,

noma izwe lesigayegaye na?

Kungani abantu bami bethi:

‘Sesidlubulundile,

asisayukubuyela kuwe,’ na?

₃₂Intombi ingakhohlwa yini yimvunulo yayo,

nomakoti ixhama lakhe na?

Nokho abantu bami bangikhohliwe

izinsuku ezingenakubalwa.

₃₃Uyilungisa kanjani indlela yakho

uma ufuna uthando na?

₃₄Emiphethweni yezingubo zakho

kufunyenwe igazi labampofu abangenacala,

nanxa ungazange ubabhadame begqekeza.

Phezu kwakho konke lokho,

₃₅uthi: ‘Anginacala.

Impela intukuthelo yakhe ingehlele.’

Kodwa sengizokukwehlulela,

ngokuba uthi: ‘Angonanga.’

₃₆Usheshelani kangaka

ukuguqula indlela yakho na?

NeGibhithe lizokujabhisa

njengalokhu wajabhiswa yi-Asiriya.

₃₇Nalapho uyophuma uthwele imikhono ekhanda,

ngokuba uSimakade ubalahlile

labo owethembele kubo;

abayukukuphumelelisa.”