UJeremiya 10

“Ningayifundi indlela yabezizwe,

ningashaywa wuvalo ngezibonakaliso esibhakabhakeni,

ngokuba abezizwe bayazesaba.

₃Imikhuba yabantu iyize;

ngokuba umuntu ugawula isihlahla ehlathini,

asixhoze ngembazo;

umsebenzi wombazi, osibaza ngembazo.

₄Abantu bawuhlobise ngesiliva nangegolide,

bawuqongqothele ngesando

nangezipikili ukuze ungawi.

₅Njengesichuse ensimini yamakhukhamba, awukhulumi,

impela uyathwalwa;

ngokuba awuzihambeli.

Ungawesabi, ngokuba awukwazi ukukulimaza,

futhi awukwazi ukwenza okuhle.”

₆Akekho onjengawe Simakade;

umkhulu, igama lakho likhulu emandleni.

₇Ngubani ongayukukwesaba Nkosi yezizwe na?

Ngokuba kuyimfanelo yakho,

akekho onjengawe phakathi kwabo bonke

abahlakaniphileyo bezizwe,

nakuyo yonke imibuso yabo; akekho onjengawe.

₈Bonke bayiziphukuphuku neziwula.

Ukuyala kwezithombe kufana nokhuni nje,

₉nesiliva elicangcathiweyo

elilethwa lisuka eTharishishi,

negolide lase-Ufazi,

kungumsebenzi wezandla zomcangcathi;

kugqokiswe okuluhlaza nokubukhwebezane,

konke kungumsebenzi wezingcweti.

₁₀Kepha uSimakade unguNkulunkulu weqiniso,

uNkulunkulu ophilayo neNkosi yaphakade;

ngentukuthelo yakhe, umhlaba uyazamazama;

izizwe azinakumelana nolaka lwakhe.

₁₂Umhlaba wawenza ngamandla akhe,

izwe walimisa ngokuhlakanipha kwakhe,

izulu walendlala ngokuqonda kwakhe.

₁₃Lapho eduma ngezwi lakhe,

kuhlokoma amanzi ezulwini;

ukhuphula inkungu emikhawulweni yomhlaba,

athumele umbani nemvula,

akhiphe umoya ezinqolobaneni zakhe.

₁₄Bonke abantu bayiziphukuphuku,

abanalwazi;

bonke ababumbi bathelwe ngehlazo

nezithombe zabo ezibunjiweyo ziyinkohliso,

azinamphefumulo.

₁₅Ziyize, umsebenzi wokuhlekwa,

ngesikhathi abayojeziswa ngaso, ziyakushabalala.

₁₆Isabelo sikaJakobe asifani nalaba,

ngokuba nguye okubumbileyo konke;

u-Israyeli uyisizwe nefa lakhe;

nguSimakade Wamabandla igama lakhe.

₁₇Qoqa umshuqulo wakho emhlabathini,

wena ohlezi ekuvinjezelweni.

₁₈Ngokuba usho kanje uSimakade, uthi:

“Bheka, ngalowo mzuzu

ngiyozijwiba izakhamuzi zezwe,

ngibacindezele ukuze bakuzwe lokho.”

₁₉Maye kimi ngenxa yokulimala kwami!

Isilonda sami sibi.

Kepha mina ngithi:

“Impela lokhu yisifo,

ngizosibekezelela.”

₂₀Ithende lami libhidliziwe,

izintambo zalo zonke zigqatshuliwe;

abantwana bami bangishiyile, abasekho,

akasekho ongangigxumekela ithende lami futhi,

nongigaxela amakhethini ami.

₂₁Abelusi bayiziphukuphuku,

abazange bamfune uSimakade;

ngakho-ke abaphumelelanga,

nomhlambi wabo wonke uhlakazekile.

₂₂Izwi lombiko liyasondela,

nokuzamazama okukhulu

okuvela ezweni enyakatho,

ukuba kwenze imizi yakwaJuda ibe yincithakalo,

indawo ehlala amakhanka.

₂₃Simakade, ngiyazi ukuthi indlela yomuntu

ayikho ezandleni zakhe

ukuba aqondise izinyathelo zakhe uma ehamba.

₂₄Simakade, ngiqondise ngobulungiswa,

kungabi ngentukuthelo yakho,

funa ungiphendule into engelutho.

₂₅Thululela ulaka lwakho

phezu kwabezizwe abangakwaziyo,

naphezu kwemindeni engalibizi igama lakho,

ngokuba bamdlile uJakobe;

yebo, bamdlile bamqeda nya,

balenza incithakalo ikhaya lakhe.