U-Izaya 62

₁Ngenxa yeZiyoni angiyukuthula,

nangenxa yeJerusalema angiyukuphumula,

kuze ukulunga kwalo kuphume njengokukhanya,

nokusindiswa kwalo njengesibani esivuthayo.

₂Izizwe ziyokubona ukulunga kwakho,

namakhosi wonke inkazimulo yakho;

uyobizwa ngegama elisha

eliyonqunywa ngumlomo kaSimakade.

₃Uyokuba ngumqhele wodumo esandleni sikaSimakade,

nomshuqulu wobukhosi esandleni sikaNkulunkulu wakho.

₄Akusayukuthiwa ngawe uNgoshiyiweyo,

nezwe lakini alisayukuthiwa yiNcithakalo;

kodwa uyobizwa ngokuthi

Ontokozo yami ikuye,

nezwe lakini ngokuthi Oganileyo;

ngokuba uSimakade uyathokoza ngawe,

nezwe lakini lendile.

₅Njengensizwa iganwa yintombi,

kanjalo amadodana akho

ayakuganwa nguwe,

nanjengokuthokoza komyeni ngomakoti wakhe,

uNkulunkulu wakho uyakuthokoza ngawe.

₆Ezingangeni zakho Jerusalema, ngimisile abalindi.

Abayukuthula nakanye imini nobusuku.

Nina enibakhumbuza ngoSimakade,

maningaphumuli,

₇futhi ningamniki ukuphumula

aze alakhe iJerusalema,

alibeke libe yindumiso emhlabeni.

₈USimakade ufunge ngesandla sakhe sokunene

nangengalo yamandla akhe, wathi:

“Impela angisayukuphinde

nginike izitha zakho okusanhlamvu kwakho,

kube ngukudla kwazo.

Abezizwe abayukuliphuza iwayini lakho elisha olikhandlekeleyo,

₉kodwa bayokudla abakuqoqileyo,

badumise uSimakade,

nabaliqoqileyo bayoliphuzela emagcekeni endlu yami engcwele.”

₁₀Phumani, niphume ngamasango,

niyilungise indlela yabantu;

yakhani, niwakhe umendo,

nikhiphe amatshe;

niphakamisele izizwe ibhanela.

₁₁USimakade uyezwakala

kuze kube sekugcineni komhlaba, uthi:

“Yishoni kuyo indodakazi yaseZiyoni, nithi:

‘Bheka, insindiso yakho iyeza.

Bheka, umvuzo wakhe uza nawo,

nenkokhelo yakhe iphambi kobuso bakhe.’ ”

₁₂Bayobizwa ngokuthi ngabantu abangcwele,

abahlengiweyo bakaSimakade.

Wena uyothiwa Ofuniweyo,

uMuzi Ongashiywanga.