U-Izaya 32

₁Kuyoba khona inkosi eyobusa ngokulunga,

nezikhulu zibuse ngobulungiswa.

₂Yilowo nalowo

uyofana nendawo yokukhosela emoyeni,

nesivikelo esivunguvungwini,

njengemithombo yamanzi endaweni eyomileyo,

nanjengomthunzi wedwala ezweni eligagadekile.

₃Amehlo alabo ababonayo awayukuvaleka,

nezindlebe zalabo abezwayo ziyokuzwa.

₄Izinhliziyo zabanamawala ziyokwazi,

zihlolisise.

Izilimi zabanamalimi ziyothombuluka

bakhulume kucace.

₅Isiwula asisayukubizwa ngokuthi siyisikhulu,

nomkhohlisi akusayukuthiwa uhloniphekile.

₆Ngokuba isiwula sikhuluma ubuwula,

nengqondo yaso iceba ububi,

yenza ukungalungi,

ikhulume okuphambeneyo noNkulunkulu,

ingamsuthisi olambileyo

nowomileyo imncishe okuphuzwayo.

₇Izikhali zomkhohlisi zimbi,

uhlela amacebo amabi,

ukuze abhubhise abampofu

ngamazwi angamanga,

ngisho nalapho ontulayo

ekhuluma okulungileyo.

₈Kodwa ohloniphekileyo

uceba okuhloniphekileyo,

futhi umi ngezinto ezihloniphekile.

₉Vukani nina besifazane abanethezekileyo,

yizwani izwi lami,

nibeke indlebe kwengikushoyo,

nina madodakazi azethembayo.

₁₀Ezinsukwini ezingaphezu konyaka

niyoqhaqhazela nina besifazane abazethembayo

ngokuba iwayini eliphambili lizophela,

nokuvunwa kwezithelo akuyukufika.

₁₁Thuthumelani nina besifazane abazinzileyo,

nihlupheke nina enizethembayo,

khumulani nibe nqunu,

nibophe izinkalo zenu.

₁₂Thwalani imikhono emakhanda,

ngenxa yamasimu amahle,

nezivini ezithelayo.

₁₃Ezweni labantu bami

kuyakumila amakhakhasi nameva,

yebo, kuzo zonke izindlu

zokujabula emzini ojabulayo.

₁₄Inqaba iyosala dengwane,

kukhale ibhungane emzini

obunabantu abaningi.

Igquma nombhoshongo

kuyoba yimigede kuze kube phakade;

kube yinjabulo yezimbongolo zasendle

nedlelo lemihlambi,

₁₅kuze kuthululelwe kithi

uMoya ovela phezulu,

ihlane liphenduke insimu yezithelo,

nensimu yezithelo kuthiwe iyihlathi.

₁₆Ubulungiswa buyohlala ehlane,

nokulunga kuhlale ensimini yezithelo.

₁₇Umsebenzi wokulunga uyokuba ngukuthula,

umvuzo wokulunga ube ngukuthula nokulondeka

kuze kube phakade.

₁₈Abantu bami bayakuhlala emathendeni okuthula,

asezindlini eziphephileyo,

nasezindaweni zokuphumula ezinokuthula.

₁₉Ihlathi liyovithizwa yisichotho,

liphele nya,

nomuzi udilizelwe phansi.

₂₀Nibusisiwe nina enitshala ngasemifuleni yonke,

enivumela izinkabi nezimbongolo

zihambe ngokukhululeka.